IPD Beaufort minamaga’au 42.04 gram syabu
BEAUFORT: Puu Boogizan Ponoizukan Koimaan talaat Narkotik (BSJN) Hongkod Upis Pulis Uvang (IPD) Beaufort nakaanu minamaga’au 42.04 gram syabu ih kihoogo RM4,300 id tohu pinonugkuan misusuvai doiti.
Huguan Pulis Uvang Beaufort Deputi Superintendan Azmir Abd Razak minoboos do apat ‘suspek’ tuhun kinoizonon kiumul 25 gisom 41 tounn nogi tinaan id ‘operasi’ duvo tadau misusuut.
“Operasi koiso jam 6.30 sosodopon id iso premis ih papanau do kapaagatan dadah nakaanu minamaga’au 5.31 gram syabu kihoogo RM600 om minanaan duvo ‘suspek’.
“Haang tosikap puu pulis minonoodo pomolisaan id boogizan iso’i id jam 7 dongosodop nakaanu minanaan songuhun vagu ‘suspek’ ih kuminam mogidu songovian 26 paket oitom kisuvang 30.28 gram syabu kihoogo RM3,000,” ka disido.
Minoboos Azmir do asil kopoihaan tuhun ginumuan, songuhun vagu ‘suspek’ tinaan id Kampung Pilajau om boogizan pulis minamaga’au 6.45 gram syabu kihoogo RM700 om buuk nota ih minonuat ‘transaksi dadah’.
Ka disido, usin tunui RM3,029 om koumatan montok moniop syabu nogi na’au om novit doid IPD Beaufort montok haang potihombus.
“Saavi-avi ‘suspek’ soizukon tumanud Seksyen 39A (1) om 15 (1)(a) Akta dadah Kohigogon 1952,” ka disido.
Pokionuon nogi disido o tuhun togumu ih kivaa kopoihaan kahasaan momoguno dadah id uvang dino nokomoi tu popoiho do kokuasaan pulis montok haang kopomunsoan.