Kusai minsisiliu puru pulis tinaan
“Songulun kagu tambalut masaon ihumon
KOTA KINABALU: Songulun kusai ih minsisiliu sabaagi puru pulis om mokianu tusin kumaa songulun moniaga nakaanu tinaan do puru pulis id iso stesen tumau di tadau Koduo nakatalib.
Boyoon Pulis Watas Kota Kinabalu Asisten Komisioner M Chandra minoboros do suai ko mokianu tusin, poposodia nogi ‘suspek’ dino do kad kointutunan kumaa munggui tuhun Pakistan dilo.
“Kinantakan nantakan id jam 11.15 dongotuong songian munggui tinaan kusai di au otutunan (suspek) ih pinopointutun do tinan sabaagi puru pulis id doumbangan Masjid Jamek Kampung Likas.
“Suspek kalapas dilo poposodia do kad kointutunan kumaa pinoporuput pogului minokianu tusin kiginumu RM100.
“Munggui di nakaanu minongintutun wuros ‘suspek’ om tambalut dau ih kiharo id suang korita ontok kinantakan minaganu laang miampai minomonsoi ruputan pulis id jam 12 dongotuong,” ka dau.
Minoboros ih Chandra do kokuasaan dau kalapas dilo minonuridong do tinimungan poimbida montok mogium ‘suspek’.
“Asil pinonoriukan potilombus mantad puru tokou, ‘suspek’ kalapas dilo nakaanu minanaan id stesen tumau Kampung Likas.
“Nahau nogi pulis o korita kawo Nisan Navara ih sinakaian ‘suspek’ ontok kinantakan, gari, kunsi, duo kaping kad kointutunan om tusin tunui RM70,” ka dau.
Tumanud dau, asil pinomorisaan nogi nokoilo do ‘suspek’ ih ‘positif dadah’ haro piipiro rikud laid kaamung kasalaan narkotik.
“Kakaal tokou poh mogium tambalut ‘suspek’ ih nointutunan sabaagi Isen Hussin ih nogi sanganu korita di nahau dilo.
“Kes diti soriukon tumanud Seksyen 170 Kanun Koinggoritan,” ka dau.