Ponuu’an kumuung Esszone pinotihombus gisom 25 Julai: Ramli
KOTA KINABALU: Ponuu’an kumuung id boogizan kavaigan tuu uvang poinsuang Zon Oumohig Kohisa’on Sabah (Esszone) ih nopupusan koniab pinotihombus gisom 25 Julai diti.
Pesuruhjaya Polis Sabah Datuk Ramli Din minoboos do ponuu’an kumuung dino kopoompit do boogizan kavaigan Tawau, Semporna, Kunak, Lahad Datu, Kinabatangan, Sandakan om Beluran miampai saavi-avi mogiigizon id boogizan koompit mositi kivaa id suvang hamin om au pakavasaon sumuvang do boogizan dino nokomoi piahatan jam 6 sosodopon gisom jam 6 kosuvabon.
“Ponuu’an kumuung pinotihombus montok papatantu do boogizan kavaigan dino nokomoi au osuvang do tuhun talaat ih mongundoonok do koumohigan mononoizuk sompomogunan ih papanau do ponoizukan om tutumombuhui ih tumomobuhui pulou ngavi podtuongisan,” ka disido id kopoihaan doiti koniab.
Minoboos isido tumanud do ponoizukan tinimungan militan Abu Sayyaf om izioho ih papanau do kapaagatan manazang montok kaganu do usin pokihapusan mantad kaabatan Filipina, kakaal kuminam sumuvang montok monoodo panazangan om koimaan talaat mozo pivohitan.
Minoboos zi Ramli do ponuu’an kumuung dino pinotihombus montok mamajamin koumohigan om kohumaagan layat Sabah ih papadadi momoguno kavaigan om ih kivaa id boogizan tinda Esszone.
Ponuu’an kumuung dino nogi papasanang do kopogiotankuasa om pongintongan kapaagatan bot om popoimbuhai do tivou oumohig om kotumbozo kumaa mongindapu ‘chalet’ om monginsada miampai koikotan kapal tinimungan koumohigan id posoihi koizonon dosido, ka disido.
“Manaak zou nogi kuasa doid toinsanan huguan pulis uvang kongoompit montok papahabus do poomit doid nombo-nombo mokianu ih momogonop do kootulan montok tuduvan kapaagatan ponginsadaan toi kivaa kogunoon koposonsog mozo boogizan ponuu’an kumuung,” ka disido.Bernama