Pulis mogium apat ‘suspek’ kes mongorumpak kisinjata
KOTA BELUD: Kakaal poh pulis mogium apat tulun di kikotumbayaan do nokoompit idsuang kes mongorumpak kisinjata id stesen tumau Kadamaian poingoros Kampung Taginambur hiti di tadau Koiso nakatalib.
Boyoon Pulis Watas Kota Belud Superintendan Mohd Zaidi Abdullah minoboros do gisom baino diti, noilaan noh do bogian diolo o iso mantad ‘suspek’ ih nointutunan sabaagi Nasruddin Kiong, 25 mantad Kampung Kesapang, ilo nopo nga ‘dalang’ tagayo kes dilo.
Ka disio kopoilaan timpuuni kinantakan id jam 12.30 tangadau dilo nantakan soira koinsanai ‘suspek’ suminakai korita Perodua Alza pinapaayan id stesen tumau dilo pogului duo mantad diolo suminuang id suang kadai.
“Songulun mantad ‘suspek’ minoguhot kumaa di mintamong kadai nung papadagang iyolo do sigup pogului goduo-duo ‘suspek’ pinapalabus pisau om minangakang kumaa munggui.
“Minogidu daa munggui dilo poingkuro poh nga nosiwatan ginayat di ‘suspek’ natadon do munggui suminonsog pinapatahak do RM4,000 mantad mesin tusin om kad pomoruhang gatang pogului ‘suspek’ minogidu,” ka disio.
Minoboros ih Zaidi do minagalu laang mantad ruputan ih winonsoi di munggui kiumur 48 toun dilo, nakaanu pulis minogium koinsanai ‘suspek’ id Kampung Sembirai, poingkuro poh nga ‘suspek’ nokosiwat minogidu doid Kampung Labuan.
“Korita ih sinakaian ‘suspek’ nokito id doumbangan iso lamin id Kampung Kesapang id jam 1.45 sosodopon om sanganu lamin minonondos tadik dau (suspek) pinotongkiad korita Perodua Alza id tohuri lamin om papapanau korita Perodua Kenari.
“Pinonoriukan potilombus nokopogowit kinokitonan korita Perodua Kenari dilo id Sikul Pintangaan Kabansaan (SMK) Taun Gusi om mintamong koumoligan minomisunud do tinongkiadan di ‘suspek’ o korita dilo pogului do tuminanud tambalut dau suminakai motosikal,” ka dau.
Kawagu disio, nahau do pulis o korita Perodua Alza om Kenari montok ponoriukan potilombus.
Tumanud dau, kakaal poh pulis mogium koinsanai ‘suspek’ om mokianu tulun ginumuan di koilo do korikohonon ‘suspek’ tuh sumikap rumomut do bogian diolo montok laang potilombus. Noboros disio do kes diti soriukon tumanud Seksyen 395/397 Kanun Koinggoritan sabap momonsoi kes mongorumpak kisinjata miampai kitimungan.