Turu lamin naraag kaamung apat ih nopunso id kinotutudan
TAWAU: Turu lamin nangaraag kaamung apat ih nopunso id kinantakan kinotutudan kawawagu id Kg Titingan, Batu 2.5 Ralan Pantai Apas, hiti id jam 7 dongosodop tadau Koiso.
Kinantakan dilo kopoompit do 34 munggui mantad onom paganakan kopoompit do 20 tulun kusai kaamung limo tangaanak om 14 tulun tondu kaamung tolu tangaanak om duo baragang.
Ponowoli naamot Boyoon Balai Bomba om Mongumolig Watas Tawau Faisal Ahmad minoboros do kiharo siam lamin id koiyonon dilo, miampai duo kinoiyonon nakaanu minongumolig.
“Tolu kagu lamin limo paratus noh naraag sabap kinantakan di nantakan,” ka dau id iso kopoilaan.
Minoboros isio do papanau karaja momisok tapui kinotutudan natamangan id jam 7.50 dongotuong kopoompit do kagarasan 25 upisor om puru om tolu injin om apat ‘utiliti’.
Tumanud dau, pinapanau karaja pomisokan tapui pinapanau miampai minomoguno kotos waig poingukab songindoros ilo nopo nga Bawang Tawau, om aiso munggui pinoruput do nosindualan.
Ontok tadau Koduo, Kumoduo Montiri Ponginabasan Takawas ih nogi Puru Parlimen Tawau Datuk Mary Yap Kain Ching om Momuruan Kotundaan Rayat Apas Sarman Amat Simito pialatan di nokotindapou kuminakap tampat kinantakan.
Id pinirubaan dilo, asaga ih Mary montok monulung koposodiaan pili bomba id bogian dilo, sabagai ponimbar mantad kopokionuon munggui kinotutudan di nokoompit.
Montok rikud, kinantakan dilo nantakan piwolitan 10 tadau ih nokopongintong do lobi 200 lamin nopunso id kinotutudan tagayo id Kg Hidayat Batu 4 Ralan Apas Tawau.