Tohu kusai tinandasan nokoompit kapaagatan posodia misangod

SANDAKAN: Tohu kusai kaamung duvo tuhun layat Indonesia pinotoguvang doid Kuut Sesyen doiti sabap kikotumbazaan do nokoompit miampai kapaagatan misangod (militan).

Nor Azmi Zahyi, 48, om duvo tuhun Indonesia izioho nopo nga zi Faisal om Ali Misron sandadaau dinawa sabap miampai kigaab mugad doid Filipina maza Malaysia montok komozon do koposodiaan monoodo nuununu noopo haang talaat id pogun dino.

Izioho sanda-daau dinawa tumanud Seksyen 130JA Kanun Koundosoan (Akta 774) ih kopogovit ukukan tolungku sohinaid timpu gisom 30 toun om minog do ontokon danda.

Nor Azmi om Faisal tinaan kiikila jam 12.20 tangadau ontok 15 Jun nakatahib id doumbangan iso butik id Lahan 3, Hongkod Kakadazan Sandakan.

Id ahal dino, dinawa nogi zi Faisal tumanud Seksyen 6 (1) Akta Bakaang ngavi Koumbakan, Kopoobusan om Sindata Kohigogon 1958 (Akta 357) sabap kivaa tohu pisau kininau 27.3 sentimeter, ontok tinaan ontok 15 Jun.

Om zi Ali Misron tinaan id Balai Koikotan Tutubpoon Kapal Tumuhud Sandakan kiikila jam 6.15 sosodopon ontok 15 Jun.

Dinawa nogi zi Ali Misron tumanud Seksyen 130B (1)(a) Kanun Koundosoan sabap kivaa bakaang di okitonan kivaa ahal talaat om kikoompitan tinimungan tinimungan talaat Islamic State (IS) id suvang talipaun piovit-ovit.

Kahasaan dino kopogovit do ukuman tolungku au kohobi do tuu toun om obuli iduon ‘hak’ nombo-nombo bakaang dino nokomoi.

Aiso kapangakuan naanu ontok pinama’aitan panandasan kes dino binoso kumaa saaviavi natandasan.

Pinatatap di Hakim Ummu Kalthom Abdul Samad ontok 22 Ogos sabaagi pama’aitan mahik kes dino.

Pangadawaan pinapanau di Kumoduvo Mangadawa Tagazo Mohd Faisal Mohd Noor ih huminansan di Kumoduvo Mangadawa Tagazo Mohd Mustaffa P Kunyalam.