Tohu ponginaman mogovit humabus 57 tong LPG pinakakung PPM
TAWAU: Tinimungan Pulis marin (PPM) Tawau nakaanu pinapakakung do tohu ponginaman mogohimu mogovit humabus 57 tong gas petroleum asavir (LPG) doid pogun poindoos miampai pinamahau’an kopoompit piaga-aga do kihoogo RM71,260.
Upisol Pemerintah PPM Tawau DSP Mohd Nazri Ibrahim minoboos do soginumu apat ‘suspek’ momogohimu nogi tinaan id suang kotohutohu kes di pinoluput piahatan tadau Kohimo om Tadau Minggu.
“Otumbazaan tokou do saavi-avi dioho masaon id pindahanan pougadan doid boogizan Sg Hj Kuning, Sebatik montok mogohimu mogovit humabus LPG,” ka disido id iso kopoihaan doiti koniab.
Minoboos isido do kes koiso kopoompit do pinanaanan duvo ‘suspek’, juragan, 24, om tanak poduu, 22, ih aiso suat kointutunan tinan om minogovit 20 tong LPG.
Om pinamahauan koduvo nopo nga kopoompit do pinanaanan songuhun ‘suspek’ tuhun kinoizonon, 28, ontok tadau Kohimo, ontok minogovit 19 tong LPG id bot di pinapanau dau.
“Pinamahauan kotohu kopoompit do pinanaanan songuhun juragan bot ih kivaa pasport sabaagi suat kointutunan tinan dau om minogovit do 18 tong LPG ontok tadau ih iso’i.
“Kotohu-tohu kes nipop di tinimungan tokou ontok pinapanau do ‘operasi’ id posoihi kavaigan Tawau, om nakapamaga’au nogi poduu om injin potozidon idsuang kotohu-tohu kes dino,” ka disido.
Haang minamaga’au koinsanai balangan om minanaan kaapat-apat ‘suspek’ papanon tumanud Seksyen 21 Akta Kawalan bekalan 1961 sabap kivaa balang tamangan aiso lisin di totopot om binoso songowian tumanud Kootulan ngavi Panamangan Kapanaakan 1974.