Tinaru Kadazandusun milo opunso nung...
Kadazandusun milo opunso mantad pomogunan diti nung au diolo posion oh boros tinaru. Mulong po timpu baino diti naramit do Koporintaan Ponontudukan o boros Kadazandusun (BKD) do potudukon id sikulan porinta (sikulan tosiriba, piintangaan, college om university) nga kalantayan popoburu om popotuduk dilo boros tumanud do sunduan tologod do tulun Kadazandusun sondiri do popotuduk.
Timpu baino kakaal tulun Kadazandusun au arahi moboros boros tina. Okugui pokimamaan diolo do mongulud abaabayan kaamatan ii onuan boros (emcee) doid BKD. Boros Malaya o gunoon diolo do moboros tikid tadau id hinonggo nopo om nunu nopo pibarasan.
Id Facebook nogi nga monurat o tulun Kadazandusun id boros Malaya (BM). Koubasanan do pilongoton diolo BM dino do boros Kadazandusun om mantad dino araat kopio o karangahan do orongou do tulun Malaya. Atalang karangahan do boros milongot dino id roiton (lyrics) do sinding di supuon diolo.
Karangahan diolo do lyrics sinding Kadazandusun irad dino minog kopio do imbosian (need to be improved). Timpu baino diti kogumuan po do sinding Kadazandusun do kilyrics di ogilo (naughty) o karangahan, om haro nogi ii au kolihis nga momohingi om monindir o paantakan.
Id gana ponupuan sinding nogi kogumuan susuminding om monunupu sinding Kadazandusun do orohian monupu roiton (lyrics) sinding ii poorot-oroton (au olumis karangahan) om mangan noopo do ponondig (merry-making) id poginuman.
Nung ongosonong oh karangahan do lyrics sinding Kadazandusun, kosudong daa ino pouniyon id radio om hinonggo nopo suopermarket id pogun diti ii ogumu sumandak om tanakwagu Kadazandusun songingkaraja. Sinding dino milo daa mongolihis tulun momomol. Id supermarket no daa koyonon tosonong kopio do karangahan sinding tongosonong Kadazandusun nung haro daa i nosupu tu mantad no do ogumu tulun Kadazandusun pakaraja id supermarket dino yolo no daa papagaras ningkokoton tinaru Kadazandusun mooi do kaanu ko solug (channel) koposolimbaan sinding Kadazandusun id koyonon togumu tulun i mogisusuai tinaru.
Modsisinding di arahi mongolihis do mokikinongou mositi no do miyon id kasanangan do roiton sinding di osonong paantakan, kolihis ginawo, kapanaak tinsasamod, pason om nogi biraso kumaa kasanangan poimpasi.