Kusai dinawa limo panandasan monombirang padagang momoli lamin, pamasangan ponogit tongus Duvo kusai nou’u id kinotutudan misusuvai
KOTA KINABALU: Songulun kusai dinawa id Kuut Majistret hiti koniab, sabap limo panandasan monipu kikoompitan miampai ponorinaan padagang momoli lamin om pamasangan ponogit tongus.
Majistret Cindy Mc Juce Balitus pinapatantu do ontok 22 gisom 29 Ogos sabaagi tadau pombisaraan kumaa di Chong Seng Fui, 35, ih kakaal mangakun au kasala.
Koiso, natandasan minonipu songulun kusai obuli monorina do pamasangan ponogit tongus om katil id lamin tabang munggui, gisom nokopongunsub dau minanahak tusin kiginumu RM22,000 kumaa di natandasan.
Kasalaan dilo winonsoi ontok 14 Mac jam 5.30 sosodopon, id Lot 12, Wisma Perindustrian, Ralan Istiadat, hiti.
Koduo, natandasan minonipu songulun tondu obuli poposikap do ponorinaan padagang momoli lamin id Taman Sinar Jaya Diri, Tuaran.
Sabap notumboyo, pinoposuang munggui do tusin kiginumu RM10,120 do idsuang akaun Public Bank sanganu natandasan.
Kotolu om kaapat, natandasan minonombirang songulun kusai giosm notumboyo montok pinapaharo pambaraian kapamagatangan lamin om sukai setem.
Sabap notumboyo pinoposuang munggui dino do tusin somporipori kiginumu RM500 om RM4,000 do id suang akaun Public Bank natandasan ontok 1 om 2 September di toun nakatalib id Public Bank Putatan.
Kolimo, ontok 5 September toun nakatalib jam 4.59 sosodopon id tampat iso’i, natandasan minonipu munggui iso’i gisom pinoposuang do tusin kiginumu RM700 do idsuang akaun dau, montok pambaraian luyar.
Sabap koinsanai kasalaan dilo, dinawa ih Chong tumanud Seksyen 420 Kanun Koinggoritan di obuli ontokon jiil ‘minimum’ sontoun om ‘maksimum’ opod toun toiko danda, toiko miampai goduo-duo dilo.
Luyar Goldam Hamid luminansan natandasan om Upisor Mangadawa Insp Rasydan Jasni minaganu laang montok pangadawaan dilo. PAPAR: Duvo tuhun kusai nou’u id duvo kinotutudan misusuvai kopoompit do duvo hamin doiti.
Goduvo-duvo munggui nointutunan sabaagi Awang Ismail Pangeran Sarifudin, 90, om Mark Jamaing, 34.
Huguan Pulis Uvang Papar Deputi Superintendan Nor Azizulkifli Mansor minoboos do munggui koiso ih nogi songuhun tuhun nohoing no nou’u id kinotutudan id Kampung Seladan Bongawan kiikila jam 7.30 dongotuvong tadau Minggu.
Kinotutudan dino nokomoi kikotumbazaan do natadon mantad lampung ih pinaapui munggui id suvang hamin dosido.
Ka disido, tanak munggui ih kivaa nogi id daamin dino nokomoi nohonuk id boogizan takod om hongon.
“Koikonon hamin munggui osodu kozo sabap kivaa id kabun (vookon tahun) om pivohitan sinodu mantad hamin timbangtimbang kiikila 300 meter.
“Ontok kinantakan tanak munggui masaon makan id hivang tombuhui om munggui kivaa id suvang hinimput.
“Songian nokoiho do tapui suminikit, pinisok daa di tanak munggui o tapui dino om minonuhung tapa dau montok manampasi tinan.
“Ingkuo po nga, munggui au mimang om kakaal minomisok daa tapui ih gumazo,” ka disido ontok kotuubungai pinapatantu do kinantakan doiti koniab.
Minoboos ih Nor Azizulkifli do tanak munggui suminikap minokianu ponuhungan om songian nokoikot bomba id tampat kinantakan, munggui dino nokito do minidu pogun id koozuvon nou’u.
Minoboos isido, ponoizukan potihombus kakaal pinotihombus om gisom baino diti aiso nunuunu ahal ngavi koimaan talaat nokito. Tanak munggui kakaal pokiubatan id Hamin Pongusapan Uvang Papar.
Id iso vagu kinotutudan id Kampung Padawan doiti, munggui kikotumbazaan do nokosivat pinopotigog puu paganakan dau kahapas nokoiho hamin dosido notutudan kiikila jam 4.30 minsusuvab koniab.
“Munggui songovian tina, tapa om duvo tadik kusai dau suminikap huminabus minanampasi tinan.
“Ingkuo po nga munggui pinoboos do suminuvang mahik doid daamin montok maganu kunsi kulita om au nakaanu huminabus gisom nokito do id koozuvon nou’u,” ka disido.
Tumanud disido, pinonoizukan potihombus nokoiho do hamin dino nokomoi kininaab 35 kaki x 25 kaki om niizonon di himo tuhun kaamung munggui.
Minoboos isido, ponoizukan gisom baino au kapatantu do nunuunu ahal ngavi au avasi id kinantakan dino.
Ka disido, tinimungan bomba nokotoguvang tokuudi kosusaan montok momisok tapui miampai tosikap sabap do natadon tadon kapanaakan vaig kivaa osodu mantad tampat kinantakan.
Ingkuo po nga ka disido, kinotutudan dino nakaanu minomisok saavi-avi kiikila jam 6.10 kosuvabon.
“Natadon kinotutudan om ginumu kinolugian kakaal id ponoizukan,” ka disido.