MPT PBT koiso tuminaru om suminain IBR id Sabah
TAWAU: Konsol Kakadaian Tawau (MPT) nokosoribau sabaagi tinan kikuasa kinoiyonon (PBT) koiso id Sabah ih tuminaru om suminain do Tumaru Koidu Susuap (IBR).
Potunud Tinan Monorina Pomunsaan Susuap Malaysia (SPRM) Sabah Datuk Sazali Salbi minoboros do laang tosonong MPT idsuang IBR alansan kopio atanud nogi di PBT suai id pogun diti.
“Monongko-au-giigina om monongkotoluod kumaa MPT sabap minaganu laang tosonong diti sabaagi laang montok monulung SPRM manangod susuap om kasala momoguno kuasa,” ka dau.
Noboros disio ahal dilo id pitimbungakan abar kalaaps suminaasi do Abaabayan Tumaru IBRkopoompit do 51 upisor MPT om 24 Puru Konsol hiti, koniab.
Tumanud dau, komitmen IBR agensi porinta miagal MPT tantu do sokodungon kopio montok popoingkawas do kotumbayanan tulun ngawi kokomoi monorina tinan di tosonong.
“Suntu dilo, laang diti kapanahak do ‘imej’ di tosonong kumaa tulun kinoiyonon om PBT suai id pointongkop Sabah, om nogi kopoingkawas do kopurimanan om tonggungan pakakaraja ngawi tulun ginumuan.
“Pakakaraja tulun ginumuan ih tuminaru om suminain do IBR lobi haro kopongunsuban songowian boyoon kotinanan diolo montok araatan susuap om kasala momoguno kuasa,” ka dau.
Porosiden MPT Alijus Sipil minoboros do laang tosonong dilo kotopong laang id bogian Koporintaan Pisompuruan om Pogun ih nakapaganu noh laang lobi pogulu.
Komitmen IBR nogi kinomi dau sabaagi tonggungan MPT sabaagi PBT montok papatantu do pironitan toririmo osiliu tanda rontob toiko impoon tagayo do pakakaraja tulun ginumuan.
Ka dau sabaagi tinan di nokoompit idsuang momonsoi kapatantuan ralan tonnudon ngawi tokoodo koporintaan kinoiyonon, alansan nogi o Puru Tinan tuh au papasala do korikohonon diolo.
“Kapatantuan om laang ih onuon di sosongulun pakakaraja tulun ginumuan om sabagai iso tinan mositi do haro koulalahon ngawi pironitan (integriti),” ka dau.