Papapanau tinaan, onom motosikal nataan mozo ‘Ops Samseng Tindahanan’

KOTA KINABALU: Onom motosikal nataan om songuhun tinaan mozo ‘Ops Samseng Tindahanan’ id Lahan Mat Salleh doiti di tadau Minggu.

Ponovohi naamot Huguan Pulis Uvang Kota Kinabalu Superintendan George Abd Rakman minoboos do saavi-avi motosikal dino nokomoi tinaan sabap mogisusuvai kahasaan tumanud Seksyen 60 Akta Padsakazan Lahan (APJ) 1987.

Piahatan dino, papapanau aiso lisin, sukai lahan naavi timpu, numbul kopolijistahan au tumanud kootulan, aiso soomin id tisan, om ‘modifikasi’ padsakazan.

Ka disido, motosikal dino nokomoi pataakon doid Koupisan Padsakazan Lahan (JPJ) montok pomolisaan ‘teknikal’.

“Iti popomiho do haang pogonuan doid sanganu padsakazan sabap pinapabanal do tuhun di aiso lisin pinapanau motosikal,” ka disido id kopoihaan doiti koniab.

Tumanud disido, papapanau ih nataan soizukon tumanud Seksyen 53 (2) APJ 1987 sabap pinapanau aiso lisin om kopongohigan insuran.

Ingkuo po nga ka disido, papapanau dino nokomoi pinoidu miampai jominan pulis do naamot magandad tadau pombisalaan kuut.

Minoboos George do papanau kalaja dino nokomoi pinapanau tuminimpuun jam 5 sosodopon gisom jam 8.30 dongosodop kopoompit do Boogizan Ponoizukan om Kopogiotonkuasa Trafik.

Ka disido, kiginumu 50 kaping saman mogisusuvai kahasaan trafif pinahabus poompus operasi dino, ih nokopokito do soginumu 100 padsakazan om 93 tuhun pinolisa.

“Operasi diti nogi manaak pongintongan doid kopomunsoan koimaan talaat om popoimbuhai do Tivo Gokomon Monoodo Kahasaan (POBC) id tampat papanau kapaagatan dino.

“Haang popogiotkuasa papanaon miampai potihombus montok momunso kapaagatan ‘samseng tindahanan’ om popogiotkuasa do undang-undang lahan,” ka disido.