RM29 riong montok Projik Kapanaakan Waig Ranau tumimpuun Ogos tabantalan

RANAU: Koporintaan Longkod maya do Komontirian Winakas Teknologi Otomou om Waig (KETTHA) popoobi do RM29 riong montok popoinggayo do kapanaakan waig id watas diti hinonggo kapamansaian dilo potimpuunon ontok Ogos tabantalan.

Opongo doti ino idsuang timpu 10 wulan om ilo ponogi pialatan tanda kotopotan porinta manalasai do kobolingkangan di notoguang rayat.

Upisor Watas Ranau Haji Faimin Kamin minoboros do poruntukan dilo nopo nga montok popoinggayo duo wokok posodia haro, ilo nopo nga Wokok Kibbas om Wokok Liwagu/Komolohing.

Ka dau, Bawang Nakamura ih kiharo id tudan Bawang Mamut noilaan do kangaam kopio silihon do ‘water intake’ wagu, sabap do waig bawang dino nokomoi oborisi, oniting om au naraag di kinantakan guminuyu tana di nakatalib.

“Alansan tokou do projik dilo tiinu kaanu manalasai do kosusaan di notoguang lobi 6,000 momoguno waig nusapan ih pinosodia do Koupisan Waig Bogian Ranau,” ka dau.

Kinomi dau do mogisusuai pongimbarasan momomoguno id Ranau ih monondos waig Bawang Bambangan om Bawang Liwagu au nodi oborisi om asaru oputut kapanahakan sabap liud kiburutak tikid timpu rumasam id koiyonon dilo.

“Onu poh nga, au minog tumongob o momoguno ngawi sabap rontob kosonongon kolidangan waig di pataakon baino diti toririmo intongan totootopot montok koumoligan momoguno,” ka dau ih nogi Ponorikohon Tinan Manalasai Kaantakan taraat Kinoiyonon Watas Ranau.