Pulis minanaan songulun ‘suspek’ kes mamagamu om mogium duo kagu kakaal poingidu
TAWAU: Pulis minanaan songulun kusai kiumur 25 toun om mogium duo kagu tambalut dau ih kakaal poingidu kokomoi duo kes mamagahau kitambalut ih pinoruput id watas diti.
Boyoon Pulis Watas Tawau ACP Fadil Marsus minoboros do ‘suspek’ ih nointutunan sabaagi Otai kotumboyo nokoompit id suang kes mamagamu pialatan April om Mei songowian duo tambalut dau.
“Kointutunan tambalut suspek nointutunan sabaagi Mai om Bos Ayud toiko Boy, goduo-duo diolo kiumur bindurugan 20-an, aiso kointutunan tinan om poingiyon id Tawau Lama.
“Iyolo kotolu kikotumbayaan nokoompit kes mamagahau talipaun piowit-owit ontok 24 April kiikira jam 10 dongotuong id Blok A3 Flat PPR Sri Titingan momoguno do pisau,” ka dau hiti koniab.
Minoboros ih Fadil do kes koduo nogi kopoompit do kes mamagahau talipaun piowit-owit om kisinjata pisau ontok 23 Mei, kiikira jam 12.30 tangadau id iso lamin kosong id tohuri SMK Kinabutan.
Kes kotolu nopo nga, kotumboyo Otai minomonsoi do ahal di au osonong gisom natadon do kinorugian songulun sanganu korita kawo Proton Saga FLX om 24 Mei, kiikira jam 2 sosodopon id Tinagat Plaza Batu 2 Ralan Apas.
“Idsuang kes diti, suspek ih tinaan kotumboyo minagawad watu doid soromin tigulu korita gisom nababak, nga minogidu kalapas munggui minokianu kinorugian,” ka dau.
Tumanud dau, kes koiso om koduo kinomi sabaagi kes mamagahau kitambalut momoguno do sinjata hinonggo ponoriukan papanaon tumanud Seksyen 395/397 Kanun Koinggoritan.
Karatas ponoriukan kes kotolu nopo nga ukabon tumanud Seksyen 427 Kanun Koinggoritan om kinomi sabaagi porobuatan taraat.
“Minaganu laang maya kopoilaan ontok 15 Julai kiikira jam 11.30 dongotuong id iso lamin Blok F Kg Muhibbah Raya, Fasa 1 Ralan Kuhara, suspek koiso tinaan pulis.
“Tumanud rikud koimaan taraat laid, suspek songulun komulakan kinoiyonon di nokoumbal noh tinaan nokoompit id suang duo kasalaan Akta Dadah Koligogon 1952,” ka disido.