Panagi nosindualan tuminuhun mantad lamin mongilag taanon do popogirotkuasa AADK
KUDAT: Songulun panagi nosindualan id ponong tinan ontok tuminuhun mantad lamin disio montok mongilag do tahanon di puru popogirotkuasa id iso ‘operasi’ hiti.
Panakadai Antidadah Agensi Antidadah Kabansaan (AADK) Kudat Siti Murni Mohd Ismail minoboros do suspek nopo nga songulun mantad 10 tulun ih noilaan (OYDS) ih tinaan id ‘operasi’ dilo.
Ka disio ‘Ops Momunso’ ih pinapanau insan-insan songowian AADK Sabah om Ranau pinapanau id watas diti tuminimpuun jam 11 dongotuong tadau Koiso gisom jam 4 minsusuab di tadau Koiso nakatalib.
“Pinapanau tokou do ‘operasi’ id piipiro tiyonon di noilaan sabaagi tiyonon panagihan dadah hiti soira pinapanau do pinonoriukan tosorisid suai mantad kopoilaan pinatahak do tulun ginumuan.
“Ontok ‘operasi’ dilo pinapanau, songulun mantad OYDS minaganu laang miampai tuminuhun mantad Tingkat Satu lamin dau montok mongilag mantad tahanon di puru AADK.
“OYDS ih nosindualan sabap laang di kopoligogon dau kalapas dilo pinaatod doid Lamin Pongusapan Kudat montok pokiubatan potilombus,”ka disio.
Minoboros isio do kiginumu 10 OYDS ih nakaanu tinaan di puru popogirotkuasa AADK om asil pinoniisan waig sobu nokoilo do koinsanai OYDS nopo nga ‘positif dadah’ kawo syabu.
“Waig sobu OYDS kalapas dilo pinaatod doid Makmal Dadah Kota Kinabalu montok kapatantuan om laang potilombus dilo,” ka disio.