Majaps moboos vagu do kopokionuon
...tu lontikon zi Malanjum Huguan Hakim Kuut Pisompuuvan Malaysia
KOTA KINABALU: Majlis Jaksa Jaksa Pendamai Sabah (Majaps) insan vagu mokianu doid Kopolintaan Pisompuuvan id siibo kopomuu’anan Huguan Montili Datuk Seri Najib Tun Razak montok mangatag doid Yang di-Pertuan Agong montok mangalantik Tan Sri Richard Malanjum sabaagi Huguan Hakim Kuut Pisompuuvan Malaysia timpu mikot.
Polosiden Majaps Datuk Seri Panglima Clarence Bongkos Malakun minoboos do miampai monoodo ahal miaga dino, Huguan Montili okon noopo monoodo do nunuunu ih tototopot om koontok mantad kavo koundangan nga adadi nogi do goduvo-duvo layat Sabah om Sarawak ounsikou kozo.
Ka disido, kopotihombusan timpu Tan Sri Md Raus Sharif sabaagi Huguan Hakim Kuut Pisompuuvan montok tohu toun vagu kopoondom dati do Kopolintaan Pisompuuvan Kigaab montok mogohim do kosivatan zi Richard mongigit kalaja kahakiman poingkakavas id pogun sondii dino.
“Iho nogi toiso-iso ih monoodo dati do pogudizaan di au apatut doid polinta om kontodonon dati do kobohingkaangan koundangan. Pisosoomo kivaa nogi kosoibau dati pisingkivahan koundangan nokomoi kapalantikan YAA Tan Sri Dato ‘Seri Md Raus sabaagi Huguan Hakim Kuut Pisompuuvan, id nombo avasi do iadon montok moningohig pionitan kahakiman id Malaysia.
“Iti adadi dati iso ‘senario’ ih misusuvai nung Tan Sri Malanjum au otoimo katapi kinootuson dino isido pinoboos hobi ‘senior’ sabap isido nalantik no doid Kuut Pisompuuvan hobi osikap vagu mantad Tan Sri Mohd Raus sondii,” ka disido id iso kopoihaan doiti koniab.
Minoboos zi Malakun do zi Richard Malanjum okon Huguan Hakim Sabah om Sarawak noopo katapi nogi Hakim Kuut Pisompuuvan di vanan kozo sabap isido linantik mantad podi 2011. Zi Richard kopinsin dati kahapas koikot umul 66 toun om 6 vuhan posoihi April 2019.
“Mositi ingaton do Pisompuuvan Malaysia tinuidong ontok toun 1963 miampai Tanah Melayu, Sabah om Sarawak ih songovian ngavi minonuidong pogun vagu sabaagi kouvang kongsi ih iso’i,” ka disido.
Mantad dino, ka disido, iho nopo nga iso kosivatan di tavasi montok mangalantik songuhun hakim vanan Malaysia Timur sabaagi Huguan Hakim Kuut Pisompuuvan kahapas 54 toun mantad podi pinonuidongan Malaysia.
“Nung au, songian ma layat Sarawak toi Sabah onuan do kosivatan montok mongigit kalaja kahakiman poingkakavas id Malaysia. Apatut naku magandad tokou sohinaid 54 toun vagu? mongudizo isido.
Suvai mantad ‘merit’ kes dino, ka disido, Richard totootopot nopo Hakim Kuut Pisompuuvan di poinvavanan kozo. Miampai mogohim disido kalaja Huguan Hakim, boogizan monguasa papatantu noopo do monondos do layat mantad Sabah om Sarawak sabaagi hobi osiibo mantad tuhun Malazu, toi goduvo-duvo pogun id Malaysia Timur nopo nga ‘koloni’ noopo.
Minoboos zi Malakun do Kopolintaan Pisompuuvan ih humansan do goduvo-duvo Pogun Sabah om Sarawak, mositi manaak kosivatan doid mamaamasok mantad Sabah lontikon sabaagi Huguan Hakim Pogun, nung au maganu o boogizan gugumaga do kosivatan montok momoguno ahal dino montok monugi ahal ngavi au avasi kumaa layat Malaysia Timur, hoohobi ontok kumimpun montok PRU14.
Richard nohodi mantad paganakan Kadazan di pantangon id Putatan. Datuk dau tiagak OKK Lojunga nopo nga Huguan Uvang Penampang ih kumoiso ontok pomolintaan kolonial British poguhui pinonuidongan Malaysia ontok toun 1963.