Mongindapu bot ponombuhuzan id Esszone mositi mamasang AIS

LAHAD DATU: Toinsanan mongindapu bot ponombuhuzan ih papanau kapaagatan id Zon Oumohig Kohisa’on Sabah (Esszone) mositi mamasang Automatic Identification System (AIS) id suvang bot dosido.

KomanderBogizan Koumohigan Poimbida Kohisa’on Sabah (Esscom) DCP Dato’ Hazani Ghazali minoboos do haang dino nopo nga vookon mantad haang om kopoinsomokan Esscom montok popoingkavas vagu gontob koumohigan tutumombuhui ngavi ih momoguno do kotoinaan dosido ontok monoodo pindahanan mantad jeti ponombuhuzan pougadan doid tiizonon pulou ngavi podtuongisan kaamung ih monoodo kapaagatan modtohop.

Minoboos isido do boogizan Esscom manaak timpu sohinaid somvuhan tumimpuun ontok 18 Julai 2017 kumaa saavi-avi mongindapu bot tutumombuhui om resort montok poposodia do kounahan dino.

“Boogizan Esscom songovian agensi ngavi popogiotkuasa ih suvai papanau do kopogiotonkuasa om pomolisaan kumaa saavi-avi bot mongindapu ponombuhuzan om resort.

“Haang tapantod onuon kumaa nombo-nombo komponi toi mongindapu bot ponombuhuzan ih oihaan kakaal au tumanud do ponuu’an pamasangan AIS diti,” ka disido id iso kopoihaan koniab.

Minoboos zi Hazani do nakapanaak no boogizan Esscom do timpu di kouha kozo doid saavi-avi mongindapu bot ponombuhuzan montok mamasang koumatan ngavi dino nokomoi montok papatantu do koumohigan bot dosido ontok kivaa id daat.

“Miampai kivaa nopo koumatan AIS, saavi-avi agensi koumohigan kaamung Esscom kaanu dati mongintong kapapanaan om gontob koumohigan bot dosido ontok kivaa id kavaigan hoohobi id kavaigan ih pinaamung sabaagi boogizan ahasu, ih okito kozo miamapi pongundonookan tuhun talaat mozo pivohitan miaga mongolumpak om panazangan.

“Tinimungan koumohigan kaanu mongintong, tumuubung om mogiboboos miampai saavi-avi kru bot ontok tikid timpu hoohobi do naamot dosido kivaa id tampat di kohigogon om momoguno do pongintongan mantad tinimungan koumohigan,” ka disido.

Namot dino, minoboos isido do boogizan Esscom nakapahabus no iso lahan tonudon koumohigan bot ponombuhuzan di nogonop miaga ih pinatantu id suang Miting Koordinasi Jeti Ponombuhuzan om suvai-suvai ahal koumohigan maritim bot ngavi ponombuhuzan ih nakaanjul ontok 24 Februari 2017 id Semporna.

“Nokoposodia no boogizan Esscom om pinopotikid do lahan tonudon koumohigan bot ponombuhuzan sabaagi susukuon om lahan tonudon nogonop doid saavi-avi mongindapu bot ponombuhuzan ih papanau kapaagatan id Esszone,” ka disido.