Papapanau noduso, susumakai nosinduahan id kohigaganan
KOTA KINABALU: Songuhun kusai noduso kahapas padsakazan Perodua Myvi ih pinapanau disido nokoompit kohigaganan miampai Perodua Alza id Lahan Khidmat poindoos pasaraya Khidmat doiti di tadau Koiso.
Ponovohi naamot Huguan Pulis Uvang Kota Kinabalu Superintendan George Abd Rakman minoboos do munggui nointutunan sabaagi Dato @Oliver Bangau, 50, mantad Penampang.
“Id kinantakan kiikila jam 11.50 kosuvabon, munggui pinoboos id pindahanan mantad Kelombong pougadan doid Bukit Padang songovian tanak kusai kiumul 6 toun.
“Munggui kahapas dino nalanggal di papapanau Perodua Alza kiumul 38 toun ih humikot mantad Bukit Padang,” ka disido.
Minoboos ih George do asil pinilanggalan dino natadon do munggui minidu pogun notihombus id tampat kinantakan.
Tumanud dau, asil pinonoizukan timpuuni nokoiho do papapanau dino monondos padsakazan munggui tigod do suminuvang lahan pitukaan mantad boogizan tiguhu.
“Iti natadon do papapanau dino sansagan minonguhok brek kolita dau gisom nakatangkid doid vanan lahan om kalanggal padsakazan munggui.
“Papapanau dino nokomoi nosinduahan tokuudi nopo om papapanau Myvi dino notipu sasaanan vanan om nipon.
“Munggui ih minidu pogun kahapas dino pinaatod doid Hospital Queen Elizabeth montok pokizazakan monoizuk,” ka disido.
Mokianu nogi isido sakadai mantad tuhun ginumuan montok monuhung ponoizukan sabap ponoizukan kakaal potihombuson.
“Tuhun togumu ih nokoiho om nokokito do kinohigaganan dino nantakan obuli tumuubung upisol monoizuk Trafik Inspektor Norkumala Osman id numbul 0138834239.
Kes soizukon tumanud Seksyen 41 (1) Akta Padsakazan Lahan (APJ) 1987.