Kada kotombirangai laang ‘mogowit lumabus’ rayat Sabah mantad UMNO, BN - Ahmad Zahid
PAPAR: Pinosorou di Kumoduo Luguan Montiri Datuk Seri Dr Ahmad Zahid Hamidi o puru UMNO om koinsanai rayat Sabah tuh au daa kopio oimbayatan miampai ponginaman tinan labus montok ‘mogowit lumabus’ (memBrexitkan) Sabah mantad galanggang UMNO om Barisan Nasional (BN).
Minoboros Ahmad Zahid do laang tinan ‘labus’ dilo, kaamung bagas kopomuruanan UMNO nayatan pogun om kabansaan di tuminongkiad UMNO, nopo nga laang di nasalaan om obuli manahak asil taraat kumaa rayat om pogun Sabah.
“Nung haro tulun labus mantad suang toou (BN om UMNO), wuros ih timpuuni dilo mantad Barisan Nasional ih kuminam mogowit rayat Sabah lumabus mantad galanggang UMNO om BN, nakasala pinongitoban diolo,” ka disio ontok minanahak boboroson pinotimpuun do Pitimungakan Miampai Pinitimungan lalansanon UMNO Zon 3 id Sikul Pintangaan Kabansaan Bongawan doros hiti koniab.
Nokotindapou nogi ih Boyoon Montiri Sabah ih nogi Ponorikohon Tinan Piturubungan UMNO Sabah Datuk Seri Musa Aman, Boyoon UMNO Bogian Kimanis ih nogi Montiri Labus Datuk Seri Anifah Aman om Datuk Abdul Rahim Ismail om Datuk Isnin Aliasni, sompori-pori Boyoon UMNO Bogian Papar om Beaufort.
‘Brexit’ nopo nga sumuku doid laang rayat Britain montok lumabus mantad Kosompuruan Eropah (EU) maya koputusan pinomuhuan rolou miampai pagarawatan do miampai sosondiri, ekonomi Britain lobi doti ogirot om aandang.
Tumanud Ahmad Zahid, monosol kopio rayat Britain miampai laang ‘brexit’ dilo sabap natadon laang dilo okon miagal ih pokilansanan diolo.
““Sabah au muhang sumiliu ‘brexit’ id Malaysia diti. Sabah au muhang BN om UMNO aala. Mantad dilo, tumanud doid toilalaan id toguang mato tokou, poingkuro monosol kopio rayat Britain om koilo tokou do nung iti wonsoyon di momuruan dilo (bagas momuruan UMNO om BN) montok mogowit insan poh kagu rayat Sabah lumabus mantad galanggang, ‘water reservior’ ih iso’i miampai ‘reservoir’ Putrajaya, om okon momuruan ih kotorimo asil katapi rayat kotorimo asil au osonong,” ka di Ahmad Zahid.
Tumanud disio nung Sabah tumongkiad galanggang UMNO om BN, koligaganan doti dino oindamaan akawas miagal di nokoumbal nawayaan di piipiro koporintaan pogun Sabah pogului diti soira minonuridong iyolo do porinta asil ‘mainan sentimen’ di au kopitunud miampai koporintaan Longkod.
Mantad dilo, ka dau, koyuon pulitik id Sabah baino hinonggo haro pikunsian kuasa id pialatan parti ngawi pikoruhangan BN kiguno do potilombuson montok kaandangan pulitik sundung pia ruhangan doti o tirikohon Lamin Koundangan Pogun Sabah (DUN) mantad 60 kumaa 73 tirikohon tiinu.
“Alansan oku do tambalut ngawi tokou idsuang BN kada onuai kosotolan kumaa Boyoon Montiri. Alansan tokou do tambalut ngawi tokou idsuang BN mirunding miampai tososonong. Ih kiguno okon kapamahagian tirikohon katapi ih kiguno UMNO om BN momorinta miampai osonong kopio id Sabah.
Otumboyo Ahmad Zahid do koporintaan BN ih ginamut UMNO kaanu doti potilombuson sundung pia miampai noruhangan tirikohon DUN dino nokomoi sabap kinonuan ponoriukan Universiti Teknologi Mara (UiTM) ontok toun 2016 nokoilo do 6 paratus rayat Sabah kakaal momoguno do ‘agenda’ popotounda Sabah.
Om nogi, ka Ahmad Zahid, pinonoriukan universiti dino nokomoi nogi ponokotanda do 71.2 paratus rayat Sabah manganggap BN nakaanu noh minomonsoi ponimbanan (transformasi) kumaa sabap om nogi ponokotanda do rayat Sabah muhang UMNO om BN momorinta Sabah.
Pinosorou nogi disio o puru UMNO om rayat id Sabah tuh balajar mantad kinantakan Tanduo id Lahad Datu om pinanangadan ‘militan’ id Marawi id kaabatan Filipina ih muhang popitongkiad tinan mantad pogun Filipina tuh kinantakan irad dilo au nodi antakan kagu id pogun diti.
Sabaagi Montiri Suang Pogun, ka Ahmad zahid, pagarason disio o Bogian Koumoligan Poimbida Disan Daat Kosilahon Sabah (Esscom) montok papatantu do koumoligan om kaandangan id Sabah kotilombus ogompi. -Bernama