Susuap: Duvo agensi polinta intongan SPRM
KOTA KINABALU: Duo agensi polinta baino diti intongan do Tinan Monoina Pomunsaan Susuap Malaysia (SPRM) kahapas kikotumbazaan nokoompit id kapaagatan susuap.
Potunud SPRM Sabah Datuk Sazali Salbi minoboos do boogizan disido baino diti nokosodia no montok papanau do ponugkuan kumaa duvo agensi dino nokomoi ontok vuhan dumonto.
“Ponoizukan diti kopoompit do duvo agensi polinta tagazo om zotokou kivaa no tanda ih kouha montok haang kosudong kozo montok dosido.
“Asil pinongintongan nogi nokoiho do boogizan ih nokoompit susuap nopo nga id piahatan upisol vanan om upisol id savat koupisan dino sondii,” ka disido.
Kavagu disido, pinongintongan om ponoizukan potihombuson papanau montok mongiho koinsanai tinan di nokoompit id kapaagatan diti.
Naamot dino id ningkokoton misusuvai, minoboos Sazali do ponoizukan osoisid nogi masaon papanon montok mongiho do kiuvaa naku kes kahasa momoguno kuasa id suang pomounan ponombuhuzan kinoizonon.
Noboos disido ahal dino kokomoi ‘demonstrasi’ ih tinoodo do Koisaan Popotunud Tutumombuhui Sabah (STGA) om Koisaan Popotunud Tutumombuhui Mamamasok (PBB) id Terminal 1 Tutubpoon Kapal Tumuhud Sompomogunan Kota Kinabalu (LTAKK) ontok 15 Julai.
“Masaon tokou monimung toinsanan kopoihaan kikoompitan montok mongiho do kivaa nnaku nuununu nakahasa monoodo mantad agensi ponombuhuzan dino sondii toi mantad agensi misosondii kikoompitan kes diti.
“Nung oihaan do SPRM do kivaa nuununu haang kahasa monoodo toi kopoompit do susuap, au toou moosi-osi montok monoodo pamagakaman kumaa nakahasa dino,” ka disido.
“Pinitimungan di pinapanau montok mangantob kapaagatan popotunud ponombuhuzan ih dinawa tohosok kiikila jam 12.30 sodop Koonom natadon do sontimungan tutumombuhui China sansagan magandad gisom jam 2.30 minsusuvab poguhui pinougadan doid pongidopan dosido id hongkod pogun.
Potunud Upis Komontilian Ponombuhuzan om Koubasanan (Motac) Sabah Ag Ahmad Zaki Abu Bakar minoboos do komponi ponombuhuzan ih pinoboos do papanau kapaagatan tohosok dino nokomoi nopo nga papanau poniagaan miamai tototopot tumanud Akta Pomounan Ponombuhuzan 1992.