Koonduan UMNO Sepanggar kosokodung poimponu kopomuruanan Najib

KOTA KINABALU: Koonduan UMNO Bogian Sepanggar koniab pinopoboros do sokodung poimponu kumaa kopomuruanan Luguan Montiri Datuk Seri Najib Tun Razak sabaagi Porosiden UMNO om Ponorikohon Barisan Nasional (BN), ka di Boyoon dau Datuk Jainab Ahmad Ayid.

Minoboros isio do sokodung au opibahagi dilo kigaab montok gumaga tuh kotilombus ih Najib momuruan pogun.

“Manahak tokou nogi sokodung poimponu kumaa Datuk Seri Musa Aman sabaagi Boyoon Montiri Sabah om Ponorikohon Tinan Piturubungan UMNO Sabah om nogi kumaa Tan Sri Shahrizat Abd Jalil montok mongigit kopomuruanan Boyoon Tinan Koonduan UMNO Malaysia,” ka disio ontok minanahak boboroson id pitimbungakan lalansanon Koonduan UMNO Bogian Sepanggar hiti, koniab.

Pitimbungakan dilo pinotimpuun di Tinan Poingkakawas UMNO Datuk Seri Tajuddin Abdul Rahman.

Namot dilo, pokionuon di Jainab tuh toinsanan puru koonduan UMNO Sepanggar au asanang otombirangan miampai gugumaga.

“Rumikot iyolo om mogidu miagal kodop. Paparaat ngawi iyolo do porinta di numbalan diolo pinoposiliu lamin om tiyonon lumuung iso timpu gulu poh, sabap au nokopitunud om au monorimo boyoon, tomodon diolo mimboros ahal di au osonong.

“Mantad dilo, posorohon ku o toinsanan puru koonduan UMNO Sepanggar au sumiliu songulun mantad diolo. Mositi mamatos toou montok tumilombus popogirot do karaja montok mamagayat ginawo rayat om papatantu do sokodung au kosimban kumaa porinta di momorinta baino diti,” ka dau.

Noboros nogi di Jainab do UMNO Sepanggar mamatos tumilombus sumiliu tulang toruntud kumaa parti doulu noh ontok pomilian tagayo.

“Kagarasan parti mositi tumimpuun mantad kagarasan tulang toruntud. Mantad dilo, koonduan UMNO mositi papatanom gaab idsuang tinan montok popogirot do sunduan om pisokodungan idsuang parti,” ka dau. Bernama