Puru UMNO mositi gumuli doid tolu ralan tonudon padamaan: Musa
PAPAR: Puru UMNO mositi gumuli doid tolu ralan tonudon (prinsip) padamaan ‘Bersatu, Bersetia, Berkhidmat’ montok papatantu do kapangaputan pisompuruan parti om nogi ‘azimat’ montok kapaganu kamanangan tagayo id pomilian tagayo timpu rumikot, ka di Boyoon Montiri Sabah Datuk Seri Musa Aman.
Minoboros isio do ‘Bersatu, Bersetia, Berkhidmat’ dilo okon ponukadan boros parti ih pimboroson ngawi di puru noopo, katapi kouhangan toiko iman-imanon ih haro rati tagayo om osiliu tiyonon om gamut kagarasan UMNO.
“Kosompuruan om kopiupakatan idsuang padamaan poposiliu tokou agaras, nga soira olunggui aala tokou. Mositi nogi do oupus tokou kumaa parti om momuruan id toinsanan koyuon. Kada kopio paparaat tokou toiko sumiliu ‘petualang’ soira atagakan karaja.
“Mositi nogi do toririmo kumaraja tokou. Yahai id Sabah, kumaraja yahai (montok rayat) potitikid timpu miampai au magandad soira pomilian. Toririmo yahai minsuang kakampungan pogului, ontok om kalapas pomilian tagayo sabap yahai okon momuruan om parti kitimpu,” ka dau.
Noboros disio ahal dilo ontok minanahak boboroson id Abaabayan Pinonimpuunan Pitimbungakan Lalansanon UMNO Zon Tiga kopoompit Papar, Kimanis om Beaufort ih pinotimpuun di Kumoduo Luguan Montiri Datuk Seri Dr Ahmad Zahid Hamidi id Bongawan, doros hiti, koniab.
Nokotindapou nogi ih Boyoon UMNO Bogian Kimanis Datuk Seri Anifah Aman ih nogi Montiri Labus, Boyoon UMNO Bogian Papar Datuk Abdul Rahim Ismail om Boyoon UMNO Bogian Beaufort Datuk Isnin Aliasni.
Musa ih ponogi Ponorikohon Tinan Piturubungan UMNO pogun minoboros do parti dilo mositi tumilombus popoingkawas papanau karaja, laang tosonong kopio om pamalanan montok popokito do UMNO nopo nga parti pilion rayat.
Tumanud disio puru UMNO id toinsanan nayatan mositi kopuriman do kuasa pinatahak do rayat okon iso kowosian katapi tonggungan om kuasa tagayo di mositi saanon montok manahak kotorinaan tosonong kopio montok kolumaagan rayat.
Pokionuon nogi di Musa o UMNO om parti pikoruhangan Barisan Nasional (BN) montok gumura sabaagi iso tinimungan montok tumilombus popogirot do porinta om papatantu do porinta kiharo id koyuon aandang.
Pinosorou nogi disio o rayat Sabah doulu noh id Papar, Kimanis om Beaufort mooi do au otombirangan om ompuong miampai ‘taktik’ gugumaga ih mimboros au otopot om mimboros mamatos au otopot.
“Iti (Papar, Kimanis, Beaufort) nopo nga tiyonon UMNO om BN. Potilombuson dagai o padamaan sabap haro tanda dagai om rikud kinodimpotan montok mogowit kotundaan id watas diti kaamung noh kotundaan tumau om gas om (talun alun tagayo) Pan Borneo,” ka dau.
Namot dilo, Anifah id boboroson dau manahak jaminan montok tumilombus gumaga do tirikhon lamin koundangan pogun om parlimen id watas dilo.
Minoboros isio do toinsanan puru UMNO om parti pikoruhangan id watas dino nokomoi, doulu noh id Kimanis, nokosodia noh montok tumoguang pomilian tagayo ontok soira-ira timpu noopo.
“JR Plus (Jalinan Rakyat Plus) tinan Koonduan, Komulakan om Puteri UMNO id watas ku diti nopo nga kagarasan dagai om iyolo iti noh ih gumaga do watas,” ka disio.
Id ahal dilo, noboros di Anifah do toinsanan parti kaamung mantad gugumaga haro ‘hak’ montok kumimpin id tolu watas dilo nga logoson noh ilo poburuon miampai osonong miampai aiso karaatan di popoompuong rayat. - Bernama