Buvazoi Tavantang kopongintong 45 tuhun mamaga’au gelaran MRK 2017
KOTA KINABALU: Piboi’an Buvazoi Tavantang kopongintong do 45 tuhun montok mamaga’au gelaran Mr. Kaamatan (MRK) 2017.
Poniikon Komiti Panganjul Buvazoi Tavantang Pogun Casey Jovial minoboos do iho nopo nga iso kopongumbasian id kapangazuvan piagahon toun poguhui dino.
“Piboi’an Buvazoi Tavantang toi nointutunan nogi sabaagi MRK kopongintong hobi avasi om ataandak kozo ontok toun diti.
“Piahatan pongumbasian ontok toun diti nopo nga kotulan pomihian om kinoingkavasan kogumuo mampazat mantad 35 ontok toun poguhui dino doid 45 tuhun.
“Nung intongan iho iso’i miaga kogumuo mampazat Unduk Ngadau Kaamatan Pogun ontok toun diti,” ka disido.
Minoboos zi Casey do pongumbasian dino nopo nga kotopong miampai umul piboi’an dino nokomoi ih sumuvang toun koopod pinangazuvan dino.
“Iti nopo nga toun kumoiso zou mongigit kalaja poniikon panganjl om kigaab montok popoingkavas om mongumbasi kovosion piboi’an MRK piagahon toun poguhui dino tu koikonon dino intongan akavas.
“Mongintong zou kapangazuvan MRK di hobi ouhud om kootulan kopolijistahan di hobi ouhud id nazatan pogun,” ka disido ontok kinopolijistahan mampazat ngavi MRK doiti di tadau Koonom.
Kavagu disido, suvai mantad pomihian nazatan hongkod, pomihian mampazat nogi papanaon id piipio uvang miaga Keningau, Kudat, Beluran, Kota Kinabalu om Klang Valley.
“Montok uvang di aiso pomihian sondii, pomihian papanaon id boogizan hongkod montok momihi hansanon potitikid uvang.
“Ahansan zikoi do potitikid uvang mangazu do piboi’an MRK sondii poguhui humaang doid nazatan pogun,” ka disido.
Pinatahang disido, momimihasa kapangazuvan MRK dino nokomoi manaak pongintongan doid hinanggou mampazat om kabaahan moboos id boos mohoing.
Tumanud disido, miapu nogi MRK do misi’ om ‘visi’ Unduk Ngadau iho nopo nga papalaku do kobilangan adat om koubasanan Kadazandusun suvai ko popointanga do basaan koubasanan.
“Om baino nadadi no koubasanan montok mongigit kalaja gelaran MRK montok mongowozo kopokitonan Unduk Ngadau Kaamatan ontok abaabazan koimpupuson MRK id nazatan pogun ontok tikid toun.
“Pangazuvan MRK baino diti nogi nakaanu ponodokan sunduvan miamapi pongintongan osoizuk mantad Komiti Panganjul Unduk Ngadau Kaamatan Pogun,” kavagu disido.
Pinatahang disido, abaabazan koimpupuson piboi’an MRK kaanjul id Narada Hotel Putatan ontok 13 Ogos.
Namot dino, kahantoi koiso piboi’an MRK Pogun 2017 dino kopogovit muhi vava RM15,555 kaamung usin tunui om piala.
Kotindapou nogi Minonimpuun om Mononontuduk MRK Walter Misir om Martin Buguk.