Koonduan Umno au monorimo pisuaian, koonduan kitudung mositi pabanaron kumaraja idsuang pomorunan perhotelan
KOTA KINABALU: Koonduan tulun Silam ih kitudung mositi pabanaron montok kumaraja id suang nunu noopo kaganaan kaamung noh perhotelan.
Montiri Kotundaan Rayat om Ahal Momoguno Datuk Jainab Ahmad Ayid minoboros ahal dilo nopo nga pialatan atag ih pinabanta do Koonduan Umno Sepanggar ontok Pinitimbungakan Tinan Koonduan Umno Bogian Sepanggar.
Minoboros isio do Koonduan Umno Sepanggar au kopio kosokodung laang nonggo-nonggo tinan ih momonsoi do pisuaian kumaa ‘hak’ koonduan om koubasanan Silam.
Suai ko ilo pinapabantan nogi iyolo atag mooi do toinsanan tinan au mongiro porinta toiko tulun ngawi moi do au mongintong aiso guno kes monorotoro sosongulun, mangasou tondu om poposinduol kopoompit do tanak ngawi om nosukod.
“Tonggungan mongintong om manahak ponudukan agama di tosonong minog do saanon di toinsanan tulun mooi tanak ngawi tokou koinsodu mantad osiliu munggui toiko momonsoi ahal ih iso’i,” ka dau.
Id ahal diti, Jainab ih nogi Boyoon Koonduan Umno Sepanggar mokianu doid puru Umno mooi papatanom gaab toiko iman-imanon montok popogirot do sunduan om pisokodungan id suang mooi piromutan oiyo ko tinan id nayatan Raan om Bogian osiliu lobi ogirot.
Maya JR Plus ih pinoimagon, ilo okitonan ‘platform’ tosonong kopio montok momouruan Umno om Barisan Nasional (BN) misokodung miampai lobi oulud.
“Ino nogi popomilo do Koonduan manahak pongintongan doid tinimungan pongundi gamut sakot sabaagi laang montok mamarati do kouhangan om kogunoon rayat.
“Pokionuon nogi o Koonduan tuh au asanaang otumbayaan kumaa gugumaga. Iyolo (gugumaga) rumikot om mogidu miagal kodop. Oruhai haro oruhai tumagak.
“Baino, paparaat ngawi iyolo do porinta di nokoumbal nolisiu lamin diolo. Aiso iyolo koilo do pogului diti lumungung nogi iyolo id suriba Koporintaan BN.
“Sabap do haro ahal au osonong di nantakan, au iyolo kosokodung do momuruan takawas ih haro gisom pinataam diolo koinsasanai om minimboros au osonong montok paparaat do porinta,” ka dau ontok minanahak boboroson id Abaabayan Pinonimpuunan Lalansanon Tinan Koonduan Umno Bogian Sepanggar, hiti di tadau Koonom nakatalib.
Abaabayan dilo pinotimpuun di Kumoduo Montiri Pomutanaman om Pomorunan Asas Tani ih nogi Puru Tinan Takawas Umno Datuk Seri Tajuddin Abdul Rahman.
Pinosorou nogi di Jainab o lalansanon Koonduan mooi kotilombus papawakas do karaja montok mamagayat ginawo rayat montok papatantu sokodung rayat kotilombus kumaa BN.
Montok momodimpot gaab dilo, koinsomokan om pongintongan tokou maan pawakaso mooi lobi opurokis, om haro katabayan montok mintamong kotundunan rayat.
“Mantad dilo pokionuon tokou popotilombus do nunu ih haro dotokou baino diti. Potilombuson kopomuruanan baino diti montok papatantu do kotilombus parti diti id Bogian Sepanggar om kaanu papanau miampai kalantoi,” ka disio.
Suai ko ilo minangatag nogi o Koonduan Umno Sepanggar tuh onuon ih Kumoduo Boyoon Bogian om pilion sumiliu Boyoon Umno Bogian Sepanggar ontok gontob rumikot.