Hogoson poloisiden UMNO, MIC papatantu do koikonon Teluk Kemang

KOTA KINABALU: Minoboos ih Timbang Polosiden MIC Datuk T. Mohan do ahal tiikon Parlimen Teluk Kemang mositi pataakon doid momuu’an poingkakavas UMNO om MIC montok ponimbangan.

“Aiso isai-isai obuli papatantu kokomoi pamahagizan tiikon suvai mantad polosiden MIC om UMNO sondii. Nung ahanan ka dosido, om ahanan tokou,” ka disido doid monunuat abal, doiti koniab.

Pinokianu isido minongomi luputan media di kavavagu ih minama’ait do pisosoomo UMNO maganu mahik tiikon Teluk kemang mantad MIC montok papatantu do kamanangan barisan Nasional id pomihian tagazo ginumuan (PRU) timpu mikot.

“Mantad kavo susuzan, Teluk Kemang mimang do pinoobi montok MIC mantad podi botoun-toun. Mantad dino au zou momusoou kivaa pangahanan tiikon,” ka di Mohan vagu.

Kinomi nogi disido do pongimboosan dino sabaagi ahal koubasanan sabap do nadadi iso koubasanan montok parti pikouvangan BN montok kapaganu do sokodung tikoon ontok timpu pomihian.

Huguan Boogizan MIC Teluk Kemang Datuk R. Balakrishnan pinoluput do minoboos do MIC aiso kobohingkaangan papataak do tiikon parlimen dino sabaagi kapangahanan miampai tiikon suvai id Negeri Sembilan.

Tiikon Teluk kemang nokoidu doid hongon gugumaga kahapas mongigit dino Datuk S. Sothinathan naaha di Datuk Kamarul Baharin Abbas mantad Parti Keadilan Rakyat ontok PRU-12 ih kahapas dino guninaga do tiikon dino ontok PRU-13. -Bernama