Miboros miampai ralan di tosonong kopio

“Kopokionuon di Sapawi kumaa mogigion songkoiyonon tumoguang do ponokialitan koburuon

SIPITANG: Mirunding mogium panalasaian tosonong kopio montok kolumaagan om timpu tabantalan.

Ilo noh ih kiguno kopio binoros di Puru Parlimen Sipitang, Datuk Sapawi Ahmad, id toguang kiikira 10,000 rayat mogisusuai tinaru ih tuminindapou kapanandakan Hari Raya Aidilfitri pinanjur do Umno Bogian Sipitang id Esplande Sipitang hiti di tadau Koonom nakatalib.

Ka disio ralan tonudon (prinsip) mirunding toiko mogiboboros nopo nga ralan tosonong kopio montok mogium panalasaian tosonong kopio soira kopoompit do toisoiso ahal toiko kobolingkangan.

“Kada noh mogiodu tokou, nga lobi osonong mogiboboros toiko mirunding. Potitikid kobolingkangan toiko ahal di koimbulai dilo tantu haro natadon dilo om tantu haro ralan panalasaian di lobi tosonong,” ka disido suminuku koponguhanan projik kotundaan id Sipitang kaamung Talun Alun Tagayo Pan Borneo ih notimpuunan noh di kawawagu.

Tumanud disio projik kotundaan di papanaon doporinta nopo nga montok kotundaan watas diti om timpu tabantalan rayat.

Minoboros isio do mimang do tikid ahal ih wagu dilo kopongimbulai ogumu ponguhatan, nga ih kiguno kopio sorohon nopo nga asil om guno dilo montok timpu tanaru.

Pangaramitan Hari Raya Aidilfitri Umno Bogian Sipitang sinakadai di Petronas Chemicals Group Bhd (PCG), ilo nopo nga montok kumointolu misusuut minonoluod nogi kiginumu RM15,000 montok Longkod Pongolingosan Suang Mogigion (PDK) om limo Masjid om Surau.

Pinaramai nogi 44 puru haji natadon mantad Sipitang ih popoturuk haji toun diti.

Nokotindapou nogi Puru Lamin Koundangan Pogun (Adun) Sindumin Datuk Ahmad Bujang, Boyoon Tinan Komulakan Umno Sipitang Yamani Hafez Musa, Tinan Puteri Umno Sipitang Suzie Hamat om Boyoon Tinan Koonduan Umno Sipitang Datuk Surinam Sadikun.

Nokotindapou nogi id Boyoon Direkorat Projek PCG Haji Iskandar Bakeri om Ponorikohon Petronas Sabah om Labuan Haji M Zaini M Yunus.

Sapawi ih nogi Potunud Yayasan Sabah minamagatang toluod potilombus Petronas montok pinapalantoi do pangaramitan Aidilfitri tikid toun om alansan kopio ilo potilombuson kagu ontok timpu ngawi rumikot.

Ginatang disio kinorikotan ribuan tulun mogisusuai tinaru ih minogiwowoyo ngawi minamaramai do karamaian dilo om nogi ponokotanda do kolumaagan om kotoonongan id pialatan rayat pogun diti.

Idsuang ahal dilo angatan disio o rayat montok tumilombus gumaga do kotoonongan di naanu miampai manahak do sokodung togirot kumaa kopomuruanan koporintaan barisan Nasional (BN) nigitan Umno.

Tumanud disio, katabayan koporintaan BN monorina pogun diti okitokopio, piagalon tinan gugumaga ih koilo mamajanji noopo nga aiso poh tanda kinatabayan diolo.

Sapawi ih nogi Boyoon Umno Bogian Sipitang minoboros do porinta haro pamalanan timpu tanaru poposimban do koburuon watas diti.

Ka disio projek ‘urea’ om ‘amonian’ Sabah (Samur) ih pinapanau id bogian Taman Pomorunan Tumau om Gas Sipitang (Sogip) nopo nga projik tagayo kotopong pomogunan ih popoingkawas do koburuon watas diti.

Sabaagi longobon sumuang tagayo tulun ngawi mantad pogun doros Brunei Darussalam om Indonesia om pogun doros Sarawak, rayat Sipitang tantu do kaanu ‘tompias ekonomi’, onu poh kagu miampai koponguhanan projek Pan Borneo.

Sapawi minokigambar kaandaman songowian wookon tombului ih nokotindapou.

SAPAWI papatahak do tusin raya kumaa wookon tangaanak ngawi di nokotindapou. Gambar wanan, wookon tulun togumu ih nokotindapou id abaabayan dilo.

Okitonan ih Sapawi ginapus di songulun mantad wookon tombului nkotindapou id abaabayan lamin poingukab Hari Raya Aidilfitri.

Ribuan tombului ih nokotindapou id abaabayan lamin poingukab kopinamot Hari Raya Aidilfitri ih pinaharo id Natad Esplanade Sipitang.

SAPAWI papatahak do ‘mok cek’ kumaa Longkod Ponundolian suang Mogigion id Watas Sipitang pinotoluod Petronas.

Sapawi papatahak do ‘mok cek’ pinotoluod Petronas kumaa Masjid om Surau nongopili id watas Sipitang kopinamot abaabayan dilo.