281 natagakan karaja
# Porinta pokionuon sumampalag # Pinotingkod di LKM kaamung 111 pakaraja id Sabah
KOTA KINABALU: Pitimungan Kosompuruan Pakakaraja ngawi idsuang Kotorinaan Tulun Ginumuan (Cuepacs) koniab minsingkiwal laang Lembaga Koko Malaysia (LKM) pinopotingkod do soosomok pitanga mantad pakaraja diolo om mokianu porinta sumampalag.
Ponorikohon dau Datuk Azih Muda minoboros do laang tokodou LKM ih haro 730 pakakaraja pinopotingkod do 281 mantad diolo au kosuang tutok sabap kogumuan diolo nopo nga pakaraja kitoilalaan id suang kaganaan somporipori.
“Sundung pia iyolo nopo nga pakaraja naamot om okon kikorikohonon atatap solinaid diti, au yahai kotorimo laang diti. Haro pialatan diolo nakakaraja noh id LKM solinaid 17 toun om miampai tigog do nokotorimo surat kopotingkodan. Iti au kosuang tutok.
“Mantad dilo, mokianu yahai porinta sumampalag doulu noh Luguan Montiri (Datuk Seri Najib Tun Razak) om montiri kikoompitan mooi koinsanai pakaraja nokoompit kotilombus tumimporon kumaraja om manahak iso ‘produktiviti’ kumaa agensi dilo om pogun,” ka dau koniab.
Ruminuba isio do monunurat abar kalapas pinapaharo do pinirubaan songowian pakakaraja LKM mantad Sabah om Sarawak ih nokotorimo surat koinopotingkodan dilo.
Tumanud Azih surat (notis) kinopotingkodan dilo kopoompit do pakaraja naamot LKM id pointongkop pogun om pogirotonkuasa 13 Ogos diti.
Mokianu nogi Cuepacs do koporintaan pogun monulung pakaraja nokoompit miampai popoiyon diolo id agensi porinta ih kangaam miampai koponorimaan somporipori.
Minoboros Azih do mantad 281 pakaraja ih maan potingkodo, 122 nopo nga pakaraja agensi dilo id Semenanjung, 111 id Sabah om 48 id Sarawak ih somporipori kaampai mantad ponulung upisol ponoriuk om panakadai ponorinaan id upis kabun om kilang LKM.
Mantad 281 pakaraja dilo, 94 tulun onuan kawagu sabaagi pakaraja ‘sambilan’ tikid tadau solinaid tolu wulan miampai gaji RM54 sangadau, ka dau.
Minoboros isio do papaatod nogi Cuepacs do surat kumaa LKM montok mokianu kopointalangan kokomoi do laang agensi dilo. Bernama