17 suspek kusai nokoompit 11 kes koimaan taraat nagakom
SANDAKAN: Boogian pulis nakaanu minanalasai do 11 kes koimaan taraat (jenayah) ih nantakan id posorili watas maya do kinagakaman 17 suspek kusai poompus wulan diti.
Boyoon Pulis Watas Sandakan ACP Mohd Azhar Hamin minoboros do siam mantad suspek ih nataan nopo nga tulun kinoiyonon om lobi dilo nopo nga tulun songkosuaian. Koinsanai suspek kiumur bindurugan 19 gisom 61 toun.
Ka dau, asil pinomorisaan potilombus nogi nokoilo do 10 mantad suspek nopo nga ‘positif dadah’ kawo syabu.
Suai mantad kapanalasai do 11 kes kopoompit do ‘jenayah’ mamabak lamin, manakau harata kakamot, manakau motosikol om mamagamu, noboros disio do nakapamagahau nogi bogian dau do 32 unit barangan, iso padsakaian kawo pikap gunoon montok kaparagatan ‘jenayah’ om iso motosikal pinanakau di nosimbanan noh.
“Poompus kotimpuunon om pintangaan Julai diti, bogian IPD Sandakan minamaganu laang opurokis miampai pinapanau do mogisusuai ‘operasi’ ih pinapaamung do potitikid koupisan montok momunso koimaan taraat miagal ‘Ops Cantas’ om ‘Ops Cegah Jenayah’.
“Operasi ih pinapanau nakaanu minamagakom tulun om tinimungan di nokoompit idsuang mogisusuai kaparagatan ‘jenayah’ id posorili Sandakan. Pialatan dilo koimaan taraat manakau tuwa piasau mamau, mamagamu doulu noh montok tinaru tondu om mamabak sumuang lamin.
“Kinalantaian kinagakaman diti nogi nopo nga asil pinisokodungan miampai tulun ginumuan ih manahak do kopoilaan gisom kinagakaman suspek nokoompit,” ka dau id pitimbungakan abar hiti.