MINSINGILO BOROS KADAZANDUSUN APASI BOROS, APASI TINARU
Nulud di Tatak Barambang
NUNG au tulun Kadazandusun moboros boros KD, ilo tinaru suai i minsingilo boros KD om soira koilo yolo monurat yolo buuk togumu i potudukon do monunuduk id sikulan do porinta.
Songkuro koikuman do tulun KD nung tinaru suai i abaal moboros om monurat boros KD, dagangon diolo i buuk kumaa tulun KD om olumaagan om ounsikaan di yolo tusin togumu. Sinakagon tulun KD rumutum nung au minsingilo boros tina om nung uhang diolo moboros boros Malaya noopo.
Koulalaho tulun KD miagal dino (au moboros boros tina om uhang nogi moboros boros tinaru suai), kopogowit kumaa kopunsaan tinaru KD id pomogunan diti om papabayaan di iso poinukadan tulun Malaya “tanak gobuk id gouton ongoyon posusuo, tanak tino poingkibit tongkiadan nogi,” ka.
Rati poinukadan dino milo nogi porotion montok do au mogupus tinaru om boros tina. Tulun Malaya momousorou do boros diolo nopo nga rusod do tinaru. Komoyon diti nopo nga nung atagak boros, tinaru nga atagak nogi.Sumusuhut diti nopo nga pinibarasan di Juil om i Juita (ngaran panarandak noopo). Alansan daa do koinggumu nodi toilaan nu do boros tina soira koompus mambasa pinibarasan diti. Kopisanangan do mambasa. Juita: Nunu kopusaan nu koulun-uluno tulun Sina? Juil: Aparu om kitutok yolo. Juita: Koborulong doho ino sisimbar nu. Juil: Tulun Sina oiyo tulun KD kopuriman do louson, tuuhan om orualan nga haro poinsuwai-suai id tutok diolo ih aiso doti id tutok tulun tokou. Juita: Atoh! aralom tomod pomisunud nu doho gisom au ku orotian. Posonongon bo gia ralan paparati doho. Juil: Tulun Sina koilo ih morobuat id dumo miagal daton nung manu yolo nga pointalib arahi yolo mongindapu ko mantad po do mongumo om sandad do kiharo id tutok doilo toilalaan mongindapu. Juita: Hehehe otopot doti ino boroson nu. Mogot nogi mongongoi ko sumandak Sina tu koilo mongindapu om manamong tanak om otudukan do boros singkung sinakagon nu. Juil: Koh asawat noh dika pokimamaan. Osorou nu asanang kusai tokou uhangon do tondu Sina? Juita: Nokuro tu au? Juil: Nokoumbal oku daa minuhang songulun tondu Sina oiyo id pingludaan ku di gulu nga boros ka dau doho do poingkaa: “aiso kaadaan ku dika muhang doho nga alaid po di timpu kito manansawo, om pupusan toh po iti pingludaan om osonong daa manansawo haro po karaja, walai om korita,” ka dau. Juita: Otopot gia iri. Tondu tokou timpu baino nga miagal dilo uhangon mantad kusai di rumahi om mongongoi dau. Juil: Iri no au ku nakasaapan rumahi dau. Walai tapa ku id gouton om aiso kurita tapa ku tontok di. Oikuman oku. Nung pinotilombus piombolutan ya om tumanud i tondu doho muli id walai tapa ku om oilaan nodi disio do kusai oku mosikin. Juita: Au minog do popoturu ko romou do monurita doho kaantakan nu miagal di. Kaantakan dino nakatalib no. Pogium do tondu mantad tinaru tokou. Juil: Totos ku mogium nga ingaa tondu arahi doho id kampong tokou diti. Juita: Ah haro ri nga gisaman do au ko koilo mogium. Juil: Tudukai oku poingkuro. Juita: Au milo miagal di. Au ko doti muhang di tondu potudukon ku dika. Poinsonong nung iya sondiri mogium tondu di koupusan nu. Juil: Otopot ino boroson nu. Pounsikou togumu. Umbalan ku miagal di. Juita: Miagal nopo.