Kuut Mabpanau nakapanahak asil
# 71,378 kes ruminijistor odomut sijil kinosusuon id Sabah nakaanu minanalasai # Noolu kes au poh nasalasai nga 5,906 kes
TENOM: Kiginumu 71,378 kes ruminijisto odomut sijil kinosusuon id pogun diti nakaanu minanalasai maya do abaabayan kuut mabpanau mantad podi 2009 gisom baino diti.
Hakim Kuut Takawas Kota Kinabalu Datuk Douglas Primus minoboros do koinsasanai kes ih pinorijisto nopo nga 77,284 kes idsuang timpu dilo om noolu kes di au poh nasalasai nga 5,906 kes.
Pinatarang disio do montok papatantu do ginumu kes diti au koingkawas ontok toun sumusuhut dino om potitikid momuruan songkoiyonon watas id pogun diti mositi papanau tonggungan mooi do aiso nogi rayat otolikudan kapaganu do surat kointutunan tinan di tototopot.
Kawagu Douglas, abaabayan Kuut Mabpanau diti miampai pisokodungan Upis Watas id potitikid pogun papanau do tonggungan kiguno montok popoilo do momuruan songkoiyonon kumaa rayat kokomoi do abaabayan diti tuh kodomuton koporijistaran sijil kinosusuon kaanu manalasai miampai au papawagat do rayat.
“Ilo sabap do abaabayan Kuut Mabpanau ih nampayat do Koupisan Koporijistaran Pogun (JPN) om agensi ngawi porinta kikoompitan mindahu gana montok papatantu do aiso tiiso poh nga rayat id pogun diti doulu noh id bogian labus kakadaian di osodu mantad kakadaian otolikudan kapaganu do kointutunan tinan di tototopot,” ka disio.
Ka dau, sokiro ko rayat pogun diti au kapaganu do kointutunan tinan di tototopot sabap do ogumu kobolingkangan notoguang diolo pialatan dilo nopo nga au nakaanu nunu noopo sakadai mantad bogian porinta om au doti kaanu ‘hak’ kowosian sabaagi mamamasok Malaysia.
Mantad dilo, alansan kopio isio kumaa molohing tuh kaanu papanau tonggungan kiguno om koilo kumaa ahal ngawi kodomutan poporijisto sijil kinosusuon tanak ngawi sompori-pori montok mongilag antakan do nunu noopo ahal.
Noboros disio ahal dilo ontok romuto do monunurat abar id abaabayan Kuut Mabpanau ih pinaharo id Upis Watas Tenom, hiti.
Namot dilo, molohing ngawi ih nokotindapou id abaabayan diti kosokodung kopio laang di winonsoi do bogian agensi porinta sabaagi laang mntok papasanang do karaja ngawi diolo.
Montok Raci Darius, 33, mantad Kampung Kelanyan minoboros do abaabyan Kuut Mabpanau diti papasanang diolo sabaagi molohing montok monorina koporijistaran odomut sijil kinosusuon tanak sompori-pori.
Ka dau, miampai haro nodi kad kointutunan tanak dau dilo tiinu popomilo do tanak dau kapaagnu do kapasanangan ponguhupan/sakadai porinta doulu noh id kaganaan balajaran.
“Iti sabap, solinaid 14 toun tanak kusai ku au nakaanu kad kointutunan tinan di tototopot. Miampai haro nopo abaabayan diti tantu noh do papasanang do nunu noopo ahal ih pokitorinaon,” ka dau.
Id abaabayan Kuut Mabpanau ih pinaharo solinaid sangadau id watas diti, kiginumu 75 kes kinodomuton sijil kinosusuon nakaanu minanalasai di Kuut Takawas Kota Kinabalu om Koupisan Koporijistaran Pogun Sabah.