Masidi: Kudat tiyonon ponombuluian kiharo pamagayatan sosondiri montok polokuon
KUDAT: Pangayuan Karamaian Kudat ih kumo-4 kopinamot miampai Toun Kumakap Kudat 2016-2017 posodia osiliu watas dilo montok tiyonon ponombuluian di ointutunan id pogun diti.
Boyoon Montiri Sabah Datuk Seri Panglima Musa Haji Aman minoboros do kosokodung o bogian porinta om mongunsub laang dilo sabap do Kudat haro pamagayatan sosondiri.
Ka dau, suai mantad kobilangan mogigion diolo ih mogisusuai tinrau, agama om koubasanan, Kudat haro posorili kadaatan di haro mogisusuai harata ih kigatang kopio om obuli silihon pamagayatan kumaa tutumombului ngawi labus.
“Tantu noh do osili gaab porinta montok popokito do lobi ogumu tiyonon kawawagu di tosonong kopio silihon sabaagi tiyonon tutumombului montok mamagayat lobi ogumu tutumombului mantad suang om labus pogun rumikot id Sabah doulu noh id watas Kudat.
“Montok tujuan dilo, Koporintaan Pogun miampai misokodung Koporintaan Pisompuruan maganu laang ngawi di potilombus montok papatantu do pogun Sabah kotilombus kaanu do kotundaan idsuang pomorunan ponombuluian hinonggo ilo nogi kaanu popoingkawas do kosunion konuonuan (ekonomi) mogigion songkoiyonon om montok pogun Sabah nogi,” ka dau.
Noboros dau ahal dilo idsuang teks pason dau ih pinolobus di Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun kopinamot pinonimpuunan Karamaian Kudat id Natad Esplanade Sidik, di tadau Kolimo nakatalib.
Narayou nogi di Musa o laang Tinan Maganu Laang Kotundaan Ponombuluian Watas Kudat id suriba kopomuruanan di Upisor Watas Kudat Sapdin Ibrahim maya pinamansaian ‘klip vedio’ papalaku solinaid 6 minit ih poposurui do katangkasan om kobilangan watas Kudat katanud miampai slogan ‘Kudat Tantu do Awakas’ kopinamot Toun Kumakap Kudat 2016-2017. Kopinamot pinonimpuunan dilo pinotimpuun nogi di Musa o kotorinaan ‘Pusat Transformasi Komuniti Begerak’ (Mobile CTC) Watas Kudat, ih ko-8 2017 ih poposodia do kotorinaan kopointalangan, ponulungan osondikot kumaa bogian pokimamaan, kosiwatan kopongindapuan kumaa mogigion songkoiyonon om popotimung do rayat id toinsanan nayatan om tinaru montok umampai kaparagatan sipoot, mogirurumoh om ‘bersukarelawan’.
Pogului, Montiri Karaja-Karaja Poimbida Datuk Teo Chee Kang ih nogi Puru Lamin Koundangan Pogun (ADUN) Kudat minagatag doid porinta montok monuridong do Longkod Transformasi miagal UTC id watas diti mooi do tulun ngawi Sabah doulu noh id Banggi om Matunggung mooi rayat koinsasanai koponorimo do kotorinaan porinta miampai asanang om osikap.
Nokotindapou nogi id abaabayan dilo nga Panakadai Montiri Ponombuluian, Koubasanan om Kinoiyonon Posorili Datuk Kamarlin Ombi, Panakadai Montiri Kotundaan Pomorunan Datuk Bolkiah Haji Ismail, Adun N.1 Banggi Datuk Mijul Onaini om Puru Parlimen Kudat Datuk Rahim Bakri.