Boros Kadazandusun kotilombus atampasi nung gunoon do sanganu atus paratus do mamarayou Kinorohingan
Kadazandusun (BKD) miagal ginaras do boros ngawi tinaru suai id pomogunan diti, iri no tu milo gunoon do rumayou Kinorohingan. Ontok orikot tadau rumamit kinosusuon do Gampamasi (Natal) dit nogi nga kiguno kopio BKD gunoon do tulun Kadazandusun do rumayou Kinorohingan. Kasanangan do momoguno boros tinaru sondiri nopo nga au atandasan o tulun Kadazandusun dilo tinaru suai do lumohou ngaran Kinorohingan id boros diolo (tinaru suai).
Ogumu tulun mantad tinaru Kadazandusun do au oliab moboros boros tinaru. Pounayan nopo nga okudian kaaka o BKD do boros pomungaran do ngaran ngawi kakamot, ngaran do nunu nopo, pomungaran do toilalaan om kakamot science, mathematics. computer om piturubungan toilaan do mongindapu.
Nga boros suai miagal ko boros Malaya nogi nga miagal di tu au ogumu boros i haro poinsandad nga soira nokosingilo yolo boros
English, nanu diolo ogumu boros English dino do pinoruhang do boros diolo, Poomitanan: oxygen nanu om sinanganu sumiliu oksigen. Nunu di bida om rati do simbanan noopo ilo poninipil? Pointantu do aiso guno nung momudali o tulun Kadazandusun do iso boros suai pomungaran do oxygen mantad no do okon ko tulun Kadazandusun o minonuridong do laboratory pinongimpolonuan do oxygen om pomungaran do science do susuai po kakamot.
Kaantakan om kangaranan do gurangot om kakamot do science, mathematics om pongindopuan, au minog tongobon do tulun Kadazandusunn nga tonudon noopo diolo ilo ngaran, kangaranan, toilalaan om koroitan i nipomungaran do tulun di minonimpuun (pioneers) minomungaran (naming), minongimpalanu (discovered) om minomudali (created) kakamot (equipments) om gurangot (goods) do science om mathematics.
Id kaantakan susuai miagal ko id kodumaan (farming), kotimbaanan (forestry), bawang (river), tawan (sky), tana (soil), totonomon (vegetation/ plants), tayam (animals), piturubungan tulun (human interactions), kinuamalongon (handicrafts), tuni om tuuniyon (sound and music), om kaantakan ngawi sundait, babas, koulun-uluno, totongonon (stories) om sinusuyan (history), om ogumu po susuai i au arait do hiti, nopo nga ogumuan o BKD do boros pangarait om pomungaran.
Nung haro songulun todu toi ko taki do angatan nu mongoi id timbaan (puru). Uhoto isio/isido nunu ka do ngaran do tikid totonomon i okito nu id dumbangan nu. Oimayaan ko do haro pomungaran disio/disido montok tikid totonomon dino miagal ko poomitanan ngaran: saraman, tawawo, kolipapo, solingkunut, gosing, gundipot, buruni, bumburing, litak, bundu, sapang, poring, sumbiling, rugading, timadang, patau, ronggu, moitap, kondungu, sintotobou, paliu, toipai, tolinting, togiwak, au omimilan ngaran nung roiton oinsanan. Mantad dino, okon ko okudian tinaru Kadazandusun do boros pomungaran do kaantakan, ngaran, maan, ula, gurangot om kakamot i haro id soribau tana diti nga gisaman no do tulun Kadazandusn sondiri i au moboros boros tina om mantad dino do nolingan di diolo ilo sontob ngaran.
Timbabaan (responsibility) tagayo do tulun Kadazandusun timpu baino diti nopo nga manalob do kopunsaan boros tina. Timpu baino hinonggo ko nopo id labus kakadayan om id kakadayan, boros Malaya boroson do tulun Kadazandusun (kaampai no tanganak). Do namot au tulun Kadazandusun mundaliu mantad kobosugan au moboros boros tina id walai, id walai panambayangan om sumambayang id boros tina, au yolo koinsud mantad koligaganan atagakan do tinaru id pomogunan diti tu boros tinaru di au boroson do sanganu nopo nga opunso do insan maso. Katagakon do boros tina mogowit kumaa kopunsaan do tinaru.
Gunoon daa tulun Kadazandusun o BKD do rumayou Gampamasi id walai panambayangan diolo id labus kakadayan hinonggo atus paratus yolo do otiitimung. Tulun Kadazandusun apatut do papaharo yolo pitimungan rumayou Kinorohingan i osompipi yolo om boros BKD daa gunoon diolo atus paratus do modsinding, sumambayang om monuduk boros Kinorohingan mantad Buuk Kinorohingan i nadalin no id boros Kadazandusun.
Miagal diti no daa apatut wonsoyon do tulun Kadazandusun id pomogunan diti iri no tu gunoon diolo boros tina do mangaramit do tadau kinosusuon do Gampamasi tikid toun moi do oilaan nodi tulun suai kagaraso BKD tu milo gunoon rumayou Kinorohingan om milo nogi potudukon id sikulan.