Ingaton ponginaman mangamu-amu BN tumilombus momorinta pogun
# Kopoingatan di Musa kumaa puru UMNO tuh tumilombus kumaraja montok rayat
TUARAN: Pinosorou UMNO tuh au maganu laang asaanang miampai korikohonon parti ih tosonong om ontok timpu diti sabap iyolo mositi miingat-ingat miampai ponginaman mangamu-amu do Barisan Nasional (BN) montok tumilombus momorinta pogun.
Mantad dilo, Ponorikohon Piromutan UMNO Sabah Datuk Seri Musa Aman, ih nogi Boyoon Montiri Sabah, pinoposorou do puru mooi tumilombus kumaraja gumaga do BN sabaagi porinta.
“Soira kiharo tokou id koyuon diolumaag, awasi om awakas, kada tokou paganu agaan miampai korikohonon tokou diti. Mositi gagaon tokou o kagarasan tokou idsuang parti miampai tumilombus kumaraja montok rayat om popogirot do injin parti,” ka disio ontok pinotimpuun do pitimbungakan lalansanon UMNO Bogian Tuaran hiti koniab.
Minoboros ih Musa do kamampuan UMNO montok tumimporon alaid om toririmo ‘relevan’ sabap do kosompuruan puru diolo montok toririmo kumaraja montok rayat om minsingubas toiko momoguno do pogibabarasan songowian montok kowosian pogun.
Minoboros isio do pambangkang aiso kamampuan montok momorinta pogun sabap toririmo haro kobolingkangan id suang.
Noboros nogi di Musa do UMNO au minggagayo toiko osumbung miampai laang diolo minsomok rayat mooi koponokodung parti dilo sumusuhut kangai-angaian parti dilo di tosonong montok manahak kotorinaan kumaa rayat solinaid diti.
“Tinan parti nopo nga ih tosonong kopio sabap au tokou mongiro timpu montok toririmo mindahu gana kumaraja montok rayat.
Sabap do ilo noh momuruan labus pogun muhang rumikot id pogun tokou montok minsingilo do poingkuro tokou momorinta pogun,” ka disio.
Kokomoi kolomian pambangkang, doulu noh Porosiden Parti Warisan Sabah Datuk Seri Mohd Shafie Apdal, noboros di Musa do porinta au mimboros do pongindaraatan soira muhang popurimon rayat kokomoi do kolomian bagas timbang porosiden UMNO dilo.
“Nonuan noh karaja kiguno idsuang kabinet Pisompuruan, muhang isio lobi kuasa kagu.
“Sabap ‘gila kuasa’, isio (Mohd Shafie) muhang moninganu noopo,” ka disio.
Pogului, Boyoon UMNO Bogian Tuaran Datuk Hajiji Mohd Noor, ih nogi Montiri Koporintaan Kinoiyonon om Pomulaminan Pogun, popotopong di Mohd Shafie sabaagi ‘penderhaka’ kumaa UMNO sabap au nakaanu pinapanau do toggungan dau ontok minongigit karaja Montiri Koburuon Labus Kakadaian om Watas gulu poh.
“Isio noh (Mohd Shafie) paparaat, gowudut. Baino, osorou disio iard do isio noh obuli sumiliu ‘juara’ rayat,” ka disio.
Noboros di Hajiji kumaa rayat montok au monorimo ‘pambangkang’ id pomilian tagayo ginumuan (PRU) timpu rumikot.
Id ahal dilo, noboros nogi isio do UMNO Tuaran minggisom kumaraja kagu montok mamalantoi kawagu tirikohon Lamin Koundangan Pogun Tamparuli, ih namanang di Datuk Wilfred Bumburing ih minamagahau tirikohon dilo mantad BN minomoguno tiket PKR ontok PRU-13. -Bernama