Papatanom sunduan padamaan di takawas
# Kopokionuon di Sapawi kumaa tinan Komulakan om Puteri Umno Sipitang
SIPITANG: Puru Tinan Komulakan om Puteri Umno pinosorou tuh popogirot do sunduan di takawas, om kaanu nogi papaamung dilo miampai lobi kiguno idsuang ginawo, montok tumoguang do ponokialitan pulitik ontok Pomilian Tagayo Ginumuan ko-14 (PRU-14).
Ontok minanahak kopoingatan dilo, Puru Parlimen Sipitang Datuk Sapawi Ahmad minoboros do ilo kiguno kopio sabap ahal dino nokomoi osiliu ahal kiguno montok padamaan parti tumoguang do ponokialitan pulitik.
Idsuang ahal dilo, ka disio, Tinan Komulakan, om Puteri Umno Sipitang mositi kotumboyo do kobulihan momuruan Barisan Nasional (BN) om Umno timpu nakatalib ih asil dilo baino obuli intongan maya asil kotundaan di nopurimanan mogigion id Parlimen Sipitang.
Ka disio, ponorimaan tosonong Umno idsuang parti ngawi pikoruhangan BN nopo nga ahal koposompuruan rayat di mogisusuai tinaru, om nogi nokopogowit kinalantayan daasom popotounda kounalan ngawi montok rayat.
“Soira koporintaan BN nokopomorinta, toinsanan dilo nakapanau miampai oulud kopio, nokopomogonop ‘kriteria’ montok mogowit kotundaan om kolumaagan rayat,” ka disio kalapas pinotimpuun do Pitimbungakan Lalansanon Tinan Komulakan om Puteri Umno Bogian Sipitang 2017, hiti di tadau Koonom.
Sapawi ih nogi Boyoon Kopoilaan Umno Sabah minoboros do puru Komulakan om Puteri Umno mositi maganu sunduang takawas momuruan gulu poh, miisom ginawo om outlid ginawo om au oruhai lumangkab sunduan, montok mamajamin timpu tabantalan.
Minoboros isio do bogian Parlimen Sipitang sondiri nakaanu noh mogisusuai wuros kotundaan ih kiguno kopio montok rayat asil padamaan momuruan Umno timpu tabantalan.
Ka disio, suai ko projik tagayo miagal pamansaian Talun Alun Tagayo Pan Borneo ih kapanahak asil kumaa mogigion id pogun Sabah om mogigion ngawi id Parlimen Sipitang, ogumu kagu poruntukan poimbida labus kakadaian di nokolulus noh om maan papanao.
Ilo kaamung noh pamansaian tangki waig om popoinggayo kapanahakan waig tolidang id Weston, Melalia om Sindumin ih kigatang RM64 riong om RM27 riong id Meligan om RM11 riong id Long Pasia.
Id ahal dilo, pitimbungakan alalansanon tinan Komulakan om Puteri Umno dilo pinaharo miampai insan-insan montok kumoinsan nogi miampai nakalantoi.
Ilo asil pinisokodungan tawakas Komulakan om Puteri id suriba kopomuruanan di Yamani Hafez Musa om Suzie Hamat.
Kiginumu 260 lalansanon Komulakan om 140 lalansanon Puteri Umno Bogian Sipitang nokotindapou pitimbungakan dilo. Namot pitimbungakan dilo, nookunan nogi atag monokodung poimponu kopomuruanan Luguan Montiri Datuk Seri Najib Tun Abdul Razak, Boyoon Montiri Sabah Datuk Seri Panglima Musa Aman om Puru Parlimen Sipitang Datuk Sapawi Ahmad.