SMK Mutiara nakaanu karayahan di Raisin
LABUAN: Notimpuunan sabaagi do iso pinsingilaan nayatan sikul, narayou oh SMK Mutiara hiti tu nakaanu pinoposiliu do Sominar om Pokitanan Kopongia’an Kreatif om Inovatif boros Inggilis sabaagi do iso ababayan nayatan kabansaan.
Minoboros ih Potunud Balajaran Labuan, Raisin Saidin do naangaian tosonong do SMK Mutiara nopo dilo nga kounsikou kopio tu nakaanu nogi minomolohou do tabaal ngawi kopongia’an boros Inggilis mantad piipiro sikul id pototongkop Malaysia.
“Sominar diti nopo nga kapanaak sokodung kumaa mongingia ngawi montok monginsonong do karalanon diolo mongia tumanud koruludon kawawagu om nokoburu,” ka di Raisin.
Pinopointalang ih Raisin dino di ontok pinopoimagon do sominar nokomoi hilo id Labuan International School di Tadau Koonom.
Minohondot do ababayan dilo nokorikot nogi tabaal kopongia’an boros Inggilis mantad Komontirian Balajaran Malaysia, Dr Tam Suet Yet.
Tumanud di Raisin, kopongia’an timpu baino nopo nga kopokianu do mongingia di abaal kopio montok monopong taangaian balajaran is suang sikul, abaal papaamung do kowoyoon momusorou rulud takawas suai ko popisompuru do kopongia’an momoguno tiknologi kopoilaan om piromutan.
Agayo kalansanan di Raisin do kaanu daa oh mongingia ngawi mongimbulai toilaan kawawagu montok popoingkawas po do taangaian kopongia’an kumaa susumikul ngawi.
Poingampai nogi potindapou ih Luguan Boogian Kotorinaan Akademik Koupisan Balajaran Labuan, Norismah Hj Ab Moin, Luguan Sikul SMK Mutiara, Louren Abon om ih Potunud Koupisan Pisompuruan Pogun, Mimie D Selvakumar.
Naamot dilo pinopointalang ih Louren do kounsikaan dau tu ontok dilo notimung oh apat mongingia poomitanan montok pinopoiyo do toilaan diolo.
Sominar toun baino nga nimaa nogi insanangai miampai kinoponguludan do pokitanan kreativiti om inovasi ih pinopoimbulai do onom wonsoi inovasi ih nakaanu pinopoingkawas do ngaran sikul om Labuan id nayatan kabansaan om sompomogunan.
Agayo kalansanan di Louren do kaanu daa oh pokitanan dilo manaak pomusarahan kumaa mongingia ngawi montok mongumbasi do pinsingilaan di kooropod.
Ababayan dilo nopo nga nayu do buruan boros Inggilis SMK Mutiara ih binuruanan di Hyginus Lester Junior Lee miampai kouhupan do koupisan balajaran Labuan om boogian School Improvement Specialist Coach (SISC+Menengah), koupisan pisompuruan Labuan om nogi Innospace Labuan.
Ikon mongingia do notimung nopo nga kapaampai di Hyginus Lester (SMK Mutiara), Dalilah Desa (SK Membedai), Samih Kukung (SK Lubok Temiang) om Suriani Alland Rice Oxley (SISC+).
Sominar dilo nopo nga nakagayat do 90 minamung mantad pialatan do mongingia ngawi Taska Perpaduan, Tabika Perpaduan, Labuan International School om mongingia ngawi boros Inggilis sikul tosiriba om lintanga Labuan.
Kinapabantaan karatas karaja nopo nga nakapaampai di Chin Tsuey Wei (SISC+), Hajah Siti Zahara Mohammad (SISC+), Norfadzillah Chin (SM Sains Labuan), Hyginus Lester Junior Lee (SMK Mutiara), Debbie Lawrence (SMK Mutiara), Lau Lee Soh (SKK SK St Anne), Hasniza Basri (SK Bebuloh), Samih Kukung (SK Lubok Temiang), Suzaina Chee (SMK Taman Perumahan Bedaun), Jayastine Antoney John (SM St Anthony), Nur Aqilatul A’aliyah (linansan di Dalilah Desa, SK Membedai) om Jaya Masir (SMK Labuan).