Apasi boros apasi tinaru
Tanak momogun (native children) i au notudukan do molohing do boros tina au koilo moboros boros tina. oros BM o hontolon diolo minsingilo id sikulan.
Boros tinaru au apatut do yadaan do tulun momogun (native people) miagal do kain pomihid i nogurinsai. Nung yadaan do tulun momogun o boros sondiri, aiso nodi kointutunan do tinaru diolo. Garung, sayau om tuni tagung au po kabagal sabaagi pogintutunan do tinaru.
Tanak Momogun i au nokoilo boros tinaru sondiri id koligaganan do okudian toilalaan id tutok om okugui pongulun-ngulun i doung momogun tu boros tinaru o winoyoon do pomusarahan om pongulun-ngulun do tulun. Poingkuro ma do mamasi boros tina?
Soira papaharo abaabayan tadau kaamatan, boros tinaru daa gunoon do tulun momogun do mongulud do sontob abaabayan dino.
Mantad do kopomogunaan miagal diti do osingilaan nodi daa do sanganu o boros tinaru sondiri om alib-alib po daa nung kiharo wawa tosonong kopio do patahakon om aramit di minsingilo dino miagal ko onuan om kaanu yolo tusin togumu tontok do kalantoi id pisintoguan i pohoroon timpu monondig do tadau tagayo kaamatan.
Montok tulun momogun i ongotumbayaan do Kinorohingan, milo yolo sumambayang id boros tinaru sabap do kinongohon do Kinorohingan ih sambayang diolo. Sinding pamarayou Gampamasi (Kinorohingan) milo supuon do tulun ngawi momogun i oliab (interested) toi ko abaal toilalaan monupu sinding.
Boros tinaru mositi gunoon do sanganu moboros id nunu nopo tulu pibarasan do tikid tadau, omkoduo-duo gana koponupuan sinding pomogunan om sinding nogi do pangarayou Kinorohingan. Id walai panambayangan dino komulakan kusai om tondu do minsingilo yolo boros tinaru i kaampai no mokinongou, moboros, mambasa om monurat.
Id walai pointikid paganakan, boros tinaru no daa boroson om komolohingan moboros do boros tina kumaa tanak di tokoroo po (mantad kotuo’on kosususu gisom kotuo’on sumuang sikulan (onom toun) om kada barasaai boros suai. Tumanud do ponoriukan do scientists, timpu kotuo’on tinan dino do osikap o tutok tanak do minsingilo boros.
Guas toi ko paantadan toilalaan monuduk boros nopo nga singilaan po tangaanak do gulu o boros tinaru. Toilaan diolo do boros tinaru impohon diolo do minsingilo boros suai i potudukon om singilaan id sikulan i kaampai no boros BM om boros English. Boros tinaru i osingilaan diolo di tanak po au diolo olingan gisom molohing om mulong po minsingilo yolo boros ngawi tinaru suai.