Musa: 232 tuhun nagakom mantad 6,188 pomolisaan
KOTA KINABALU: Kiginumu 232 nagakom popogompit ginumu 6,188 pomolisaan nakapanau do Koumohigan Kinoizonon Tisan Daat Kohisaon Sabah (Esscom) mantad po do piniimangan id kopulauaan Marawai Polipin.
Vozoon Montili Datuk Seri panglima Musa Haji Aman minoboos, toinsanan nagakom dii tinoodo id kotoinaan mitamba id kinoizonon Zon Koumohigan Tisan Daat Kohisaon Sabah (Esszone).
Ka disido, pomolisaan om pipio pinamagakaman id kinoizonon daat nga pinogiot do Esscom miampai ajinsi koumohigan om papapanau undangundang id kinoizonon Esszone.
Kosusuut mantad kinaantakan id kopulauaan Marawi dii ka disido pinopointahang, Esscom minaganu pipio kotoinaan timpu toduuk.
“Pomolisaan mitamba miampai pomolisaan osoinig pinointutun maza koinsavatan pomolisaan id daat pivohitan miampai tinimungan kotoinaan mitamba.
“Suvai ko ino, Esscom nga pinopogumu do pomolisaan id kinoizonon i noihaan dumadi tampat dadahon minodidikot aiso kasagaan (PTI) id Esszone miampai monoodo kotoinaan mitamba.
Pomolisaan topiot id vavazaan sumuang om humabus miaga gana kapal tutumuhud om lolokiton nga poinsvaton nogi,” ka disido.
Noboos disido iti ontok suminimba pogudizaan Datuk Mohamad Alamin (BN-Bongawan) kokomoi piinsamakan i naanu do Esscom montok padtahaban kosuangan tuhun mantad suvai pogun kosusuut do kinaantakan id Marawi Polipin.
Musa minoboos, pipio haang timpu tanauu nakapanau id pinanadaan pionitan tohu lahan sabaagi ‘Trilateral Cooperative Agreement’ (TCA).
Tumanud disido,piunungan i popogompit Pogun Polipin, Indonesia om Malaysia di kituduvon do monoina ahal koumohigan id pivohitan pogun.
“Asil mantad pinilundingan diti, totohu pogun nakaakun do monoodo Komiti Nazatan Tasavat.
“Iso Hongkod Kopoihaan Miatama notoodo popogompit piahanan upisol id piahtan pogun montok do kopoinsavatan ‘maritme Domain Awareness’ montok pikunsian kopoihaan id piahatan pogun.
“Id iso i timpu, pinghudaan sompipogun nga nakapanau do monoodo ‘inter-operability’ suvai ko papagazo pitambaan id ponoizukan id piahatan pogun,” ka disido pinoposoto.
Nokoboos isido, ontok 19 Jun nakatahib kopolintaan nokoponoodo ‘Maritime Command Centre’ (MCC) id poinhongkod id Bangao, Pilipin, Tarakan Indonesia, om Tawau.
Ka disido, totohu hongkod naait kitonggungan sabaagi hongkod ponimungan data om pisakadazan pomolisaan tohu pogun.