Mee Sup Pipin cafe noukab id New World Commercial Penampang
PENAMPANG: ‘Mee Sup Pipin’ nopo nga nointutunan kumaa do tuhun id uvang diti toi id hongkod pogun.
Zosido nopo nga pongindopuan paganakan i papadagang mee sup kinoizonon om nokotimpuun mantad Tomu Inobong.
Mee Sup Pipin do baino kivao padagangan id Taman Khidmat, Menggatal, Kingfisher om Tuaran.
I nopo kavavagu doid pongindpuan miaga naait nga i Aileen Dison, moing tondu kusai om tondu dosido minonimpuun ‘mee sup Pipin’ id 1970dan.
Katapi Aileen mongindapu miampai papaamung muzik, kupi poimbida om tindalam id tampat padagangan dosido id New World Commercial id Penampang.
“Ngaan do padagangan ku nopo nga Mee Sup Pipin and Cafe. Laan diti nga poinsusuvai mantad dovokon sabap zosido nopo nga tumimpuun mantad cafe. Piomungon dagai takanon om muzik om poposuuung zikoi kupi om tindalam poimbida,” ka dosido.
Nakaanu degree id muzik mantad Australia diti minoboos kituudvon zosido do mongindapu id muzik katapi aiso do nokinaman dosido montok dino.
“Katapi kivao do nokinaman ku id pongindopuan takanon dadi minomusoou zou nokuo tu au kinaman diti (pongindopuan baino). Dadi pokianu zou do sakadai mantad puu paganakan ku om nogi i mamai ku tu poinpuu id Kadazan Chamber of Commerce (KCCI). Minuot zou disido onu o gunoon ku do monimpuun iso pogindopuan.
“Miampai tutuduk om sakadai dioho, nokopongukab zou do cafe diti,” ka dosido ontok pinogukaban do padagangan di kavavagu.
Naamot, polosidin KCCI Datuk Bonipasius Bianis ontok pinogukaban di minoboos zi Aileen nopo nga kivao do ontodonon dosido id pongindopuan om iti popokito do komuhakan KadazanDusun Murut nga ongopulokis.
“Sundung potuu zi Aileen kivao degree id Music Engineering duminadi zosido do songuhun mongingindapu.
“Manakadai zikoi nogi do komuhakan do monoodo website miampai poposuang do kavo pongindopuan dioho,” ka disido minongoput KCCI kivao 680 puu id Sabah.