Kada koimbayatai ‘sentimen’ mimpulitik popibabak om kotukanaan - Hishammuddin
TENOM: Pokionuon di Timbang Porosiden UMNO Datuk Seri Hishammuddin Tun Hussein o rayat id Sabah tuh au asanang oimbayatan miampai bogian di kuminam papatanom pulitik kotukanaan om popibabak gisom obuli mongundoronok koumoligan pogun montok kopontingan pulitik noopo.
Minoboros Hishammuddin, sokiro ko koumoligan id pogun diti, doulu noh id Sabah, akasou sabap do porobuatan bogian di aiso tonggungan dino nokomoi ih poposiliu do koumoligan sabaagi ‘taruhan politik’, om tantu do rayat pogun diti ih mananggung asil dilo.
“Sokiro ko koumoligan Sabah diti osiliu ‘pertaruhan’, osiliu gadaian, kotutukon dilo nung ponimbangan diolo osilap, ih osiliu munggui tiinu nopo nga rayat Sabah sondiri di aiso douso. Iti ih nantakan id pogun Timur Tengah om pogun pointantu,” ka disio.
Hishammuddin ih nogi Montiri Gugumaga minoboros ahal dilo kumaa monunurat abar kalapas pinotimpuun do Pitimbungakan Lalansanon Koonduan, Komulakan om Puteri UMNO Zon 4 hiti koniab. UMNO Zon 4 kopoompit do UMNO Bogian Keningau, Tenom om Pensiangan.
Nokotindapou nogi id abaabayan dilo nga Boyoon UMNO Bogian Keningau Datuk Sairin Karno, Boyoon UMNO Bogian Tenom Datuk Rubin Balang om Boyoon UMNO Bogian Pensiangan Datuk Abdul Ghani Mohd Yassin.
Tumanud Hishammuddin, koinsomokan mimpulitik kotukanaan om pibabakan ih umbalan gunoon do bogian gugumaga id Sabah, kaamung noh ih nokoumbal kiharo id suang porinta iso timpu gulu poh, obuli kopogowit doid pibabakan.
Sabaagi suntu, ka dau, ahal Sabah montok tulun Sabah ih sugion do momuruan dino nokomoi obuli popibabak om okito kigaab pulitik sosondiri sabap ontok momuruan dilo kiharo id suang porinta gulu poh, au insan mongungkit do ahal dilo.
“Nung muhang mimpulitik nga haro kapatantuan dilo... iti ih posorohon ku kumaa lalansanon baino. Kada pama-main miampai ahal pitinaruan, ahal gama, ahal mimpulitik pialatan Sabah om Semenanjung. Ula noh olumis nodi (koyuon tokou) solinaid diti.
“...(Koulalahon) odoot, tamaa, minggagayo, otogod, kiginawo daa mamagahau kuasa om gaab poposonong ralan diti toinsanan koligogon kopio. Mositi patarangon tokou kumaa tulun togumu do aiso parti suai mantad Barisan Nasional (BN) ih lobi ‘konsisten’ maya do wotik kulit om agama montok popotungag om moningolig nasib rayat Sabah diti,” ka di Hishammuddin ih nogi Montiri Karaja-Karaja Poimbida.
Mantad dilo, ka, Hishammuddin, ‘komitmen’ koporintaan pisompuruan montok papatantu do koumoligan Sabah toririmo kijominan, au obuli pisingkiwalan sabap mogisusuai laang nakapanau noh montok momodimpot iman-imanon dilo kaamung noh popoiyon do lobi ogumu harata koumoligan id Sabah, doulu noh id disan daat kosilahon.
Ka dau kogumu harata ngawi doung susumangod om koumoligan om puru koumoligan ih pinoiyon id Sabah pisosoromo tolu gisom inggapat lobi kogumu piagalon di pinoopi id pogun sandad disio sondiri ilo nopo nga Johor.
Kokomoi korikohonon UMNO Sabah, minoboros Hishammuddin do pogun dilo nokoguli noh miampai puru om kopomuruanan dau minanaak pongintangan poimponu doid padamaan timpuuni parti om osodu pisuaian piagalon toun nakatalib ontok haro momuruan UMNO pogun dilo luminabus tuminongkiad parti.
Tumanud dau, Boyoon Montiri Sabah Datuk Seri Musa nokopomuruan Sabah miampai tosonong kopio om haro ogumu pamalanan montok kotundaan timpu tabantalan Sabah nga toinsanan dilo kaanu doti popoburu sokiro ko kapaganu kuasa tagayo mantad rayat ontok pomilian tagayo ginumuan timpu rumikot. -Bernama