PBS mositi minggisom kumalaja, papatantu do kamanangan ontok PRU14: Pairin
KOTA KINABALU: Potitikid injin Parti Bersatu Sabah (PBS) id boogizan sandadaau mositi minggisom kumalaja montok papatantu do poingkakaton parti dino kaanu kahantazan id Pomihian Tagazo Ginumuan ko-14 (PRU14).
Polosiden PBS Tan Sri Joseph Pairin Kitingan minoboos do miampai kahantazan noopo obuli papatantu do kuasa om ohou PBS id suang Barisan Nasional (BN) hobi okuat.
“Au no ahaid oikot timpu PRU14, mositi papatantu toou do injin tokou okuat om poinsodia tumoguvang ponokiahitan ontok PRU diti.
“Ahal ih iso’i poposoto zou doid PBS Boogizan Tanjung Aru tu papatantu do Tiikon ih nigitan PBS baino dino kaanu popotimpoon miampai ‘majoriti’ tagazo ontok PRU14,” ka disido ontok pinotimpuun do Pitimbungakan Tagazo Tounan PBS Boogizan Tanjung Aru, doiti koniab.
Minoboos isido, saavi-avi injin PBS mositi momoguno do kapandaian sandadaau montok monguhud haang di tavasi.
Minoboos isido, onu ih kiguno nopo nga momodimpot do kahantazan ontok PRU14 om popotihombus do padamaan montok layat id Sabah.
“PBS mositi maganu haang di tavasi montok momodimpot iman-imanon ohidas parti, kalaja tavasi sohinaid diti kaanu mongintong miampai mogikaakavo kinodimpotan mantad guhu po gisom baino.
“Toihahaan om ponokiahitan di notoguvang gisom baino okon toiso-iso di asaanang nga zotokou tantu kahantoi tumoguvang do nunu noopo ponokiahitan miampai opulokis,” ka disido.
Pairin ih nogi Kumoduvo Vozoon Montili mokianu doid saavi-avi layat Sabah tu au asanang aahung miampai tinimungan kavavagu ih papalayat do ‘propaganda’ dosido mozo ‘laman sesawang’ om nogi kimpin.
Ka disido, ahal ngavi ih posuaton palayaton id ‘media sosial’ okon saavi-avi otopot. Layat mositi kaanu momoguno do kapandaian sanda-daau papatantu do abal di potikidon.
“Puu tokou nopo nga ada kozo pogidu mantad padamaan om iman-imanon tototopot parti di tavasi, ada asanang aahung mantad tinimungan ngavi diti ih koiho mimboos noopo.
“Au tokou nogi koiho do otootopot nangku tinimungan diti toi mimpulitik noopo montok momogonop do ‘agenda’ dosido noopo,” ka disido.
Nokotindapou nogi id pitimbungakan dino nga Huguan PBS Boogizan Tanjung Aru Datuk Edward Yong Oui Fah om nuhudan kopomuu’anan PBS ih suvai.