Ingaton ‘virus’ momiraag Umno: Sapawi
SIPITANG: Pinosorou o puru Umno tuh toririmo miingat-ingat miampai nunu noopo ‘virus’ di obuli momiraag kogirotan parti, doulu noh ontok miririkot timpu pomilian tagayo ginumuan ko-14 (PRU-14).
Boyoon Umno Bogian Sipitang Datuk Sapawi Hj Ahmad, ontok minanahak kopoingatan dilo, minoboros do mogisusuai ‘virus’ mantad suang om labus parti obuli mogowit pibabakan nung puru Umno au miingat-ingat om asanang oimbayatan.
Id pason kinoluntanan poimponu kisunduan ontok pitimbungakan lalansanon Umno Bogian Sipitang hiti di tadau Koonom, isio ih nogi Puru Parlimen Sipitang minoboros do ‘virus’ pusingon, kigaab mosolon/ataian, paparaat om ‘propaganda’ obuli osiliu ‘rugi om daging’ kumaa parati.
Irad ngi id labus parti, ka disio, gugumaga baino koilo mogium ‘waris’ om manahak ‘kalansanan’ miampai mamatos kilinangkou ‘wulan om rombituon’ kaaka do ‘oupus Sabah’ nga otopot nopo iyolo sondiri aiso tiyonon rikoton (halatuju) okon ko miagal koporintaan Umno om Barisan Nasional (BN).
Mikuo minanahak kopoiradan pulitik ‘tuwa kembayau’ om tuwa kana’, minoboros isio do rayat mositi koilo mamagatang toiko papatantu do nunu noopo ih pimboroson do gugumaga om mongintong ‘track record’ ih nowit do koporintaan BN solinaid diti.
Ka disio, ‘prinsip’ koporintaan Umno om BN nopo nga popogumu do kumaraja montok rayat, om mimboros noopo soira kiguno, ilo nga miampai haro kopoilaan.
“Patarangon tokou kumaa rayat miampai haro kopoilaan kokomoi do onu ih wonsoyon do porinta, om mantad dilo rayat mositi koilo mamagatang dilo,” ka disio.
Id ahal dilo, nulit di Sapawi om pomusarahan sondiri Umno Bogian Sipitang monokodung poimponu kopomuruanan Luguan Montiri Seri Najib Razak id bogian Longkod om Boyoon Montiri Datuk Seri Panglima Musa Aman id bogian pogun.
Ontok romuto kalapas dilo, monongkotoluod isio sabap nakapanau pitimbungakan dilo miampai tososonong sabap ilo kiguno montok ‘platform’ manahak kopointalangan kumaa momuruan gamut sakot pogului sumuang galanggang pomilian tagayo tiinu.
Ka disio, onu ih posotolon nopo nga ahal koposompuruan om pisaan, papataru do kogunoon parti manalasai do kopontingan tinan sondiri.
Lobi 700 lalansanon mantad soosomok 300 raan tuminindapou pitimbungakan dilo.