Kapanganjuran karamaian suku tinaru id Sabah popogirot do pisompuruan: Musa
BELURAN: Kapanganjuran karamaian suku tinaru (etnik) id pogun diti nosiliu impoon montok tumilombus popogirot do tiwou oiyo kotokou om piobpinaian rayat, ka di Boyoon Montiri Sabah Datuk Seri Musa Aman.
Mantad dilo, minoboros isio do koporintaan pogun manahak sokodung poimponu kapanganjuran karamaian montok nonggo-nonggo suku tinaru id pogun diti.
“Mositi toririmo koondom tokou do kololoisan (seni budaya) ih tinungkusan mantad taki-todu tokou om iso mantad dilo nopo nga maya do panganjuran karamaian.
“Suai ko ilo, ilo nogi osiliu iso impoon montok tumilombus popogirot do tiwou oiyo kotokou om piobpinaian pialatan dotokou oiyo kotokou,” ka dau ontok pinotimpuun do Karamaian Tagunggu id Paitan, koniab.
Nokotindapou nogi ih Kumoduo Yang Dipertua Dewan Rakyat ih nogi Puru Parlimen Beluran Datuk Seri Dr Ronald Kiandee.
Tadau toiko Karamaian Tangunggu Paitan tinimpuunan pinanjur mantad podi 2006 pinopointanga do tuuniuon, sayau, om koumatan tagunggu suku tinaru Sungai Sugut.
Minoboros ih Musa do pisompuruan pialatan rayat id pogun diti sundung pia haro mogisusuai suku, tinaru om agama kohimayaa kopio do tulun ngawi suai id pogun diti.
Ka disio pisompuruan dilo nosiliu ahal kiguno rayat id pogun diti apasi id koyuon otoonong om olumaag.
Minoboros isio do kopoposion otoonong om olumaag dilo koponoluod doid kaadangan pulitik montok popomilo do porinta manahak pongintongan karaja popotounda do pogun diti montok oguno do rayat.
Id ahal dilo, noboros di Musa do watas tokoodo Paitan ih poinsumpak id labus kakadaian au oiduanan mantad koluyungan kotundaan doulu noh mantad kawo kounalan talun alun, kapanaakan lotiri om waig.
Nga, ka disio, koilo o porinta do kakaal ogumu kotundaan kiguno kopio wonsoyon id watas dilo montok kolumaagan rayat. -Bernama