Rasam tasapou piipiro tadau, natadon nongoliudan id piipiro watas id bogian kotonobon Sabah
KOTA KINABALU: Rasam tasapou minogompus mantad podi limo tadau nakatalib natadon do nokoliud id piipiro watas id bogian kotonobon Sabah kaamung hiti, Penampang, Papar om Kota Belud.
Boyoon Longkod Papanau Karaja (PGO) Koupisan Bomba om Mongumolig Malaysia (JBPM) Sabah, Khatizah Rahaban minoboros do bogian dau nokopokirud do piipiro karaja pongintongan montok bogian di nantakan au osonong.
“Kopoilaan ih naanu mantad Balai Bomba om Mongumolig (BBP) Lintas pinoporikud do pialatan koiyonon di nalabpaian waig kaamung noh Ralan Tuaran Bypass kaamung goduo-duo ralan mantad Bandar Sierra pakaayan id Binaung Baru, Kampung Tebobon om bogian mitoguang Taman Putra Jaya.
“Kampung Mansiang, Kampung Rampayan om Ralan Tuaran laid montok popiromut do Kakadaian Manggatal pakaayan id Buluatan Pulutan om Ralan Kampung Timbok nogi nga nantakan au osonong sumusuut nokoliud kirinalom 0.2 gisom 0.6 meter id tampat nokoompit,” ka dau.
Minoboros isio do pialatan koiyonon di nalabpaian waig nogi kaamung noh pomulaminan Seri Warisan, Kampung Kitobu om Ralan Kampung Pomotodon Inanam.
Gisom baino diti, bogian dau au poh nokoporikud nunuunu kopowolihan mogigion id bogian Kota Kinabalu, Inanam om Manggatal om koinsanai puru id BBP Lintas om BBP Kota Kinabalu idsuang ‘mod’ pongintongan montok nunu noopo kaagaban.
Tumanud dau, montok bogian Penampang kiharo 14 bogian di noilaan antakan doti koligaganan liud.
“Bogian di pinoboros kaamung noh Kampung Buliga, Kolopis, Maang, Kibabaig, Napasan, Kiranau, Taman Penampang, Sugud om Sindanan.
“Piipiro linominon kaamung noh Sikul Tosuriba Kawo Kabansaan (SRJK) Yue Min, Longkod Upis Pulis Watas (IPD) Penampang, Upis Watas Penampang, Upis Pos Penampang om Konsol Watas Penampang nogi nga naraag liud.
“Poposorou tokou nogi do momomoguno talun alun montok toririmo miingat-ingat id Ralan tagayo kaamung Sugud, Donggongon, Penampang Proper, Bulatan Sigar, Ralan Penampang Spur sabap antakan dati koligogon oimangan liud di kopotongob,” ka dau.
Minoboros isio do nokorikud noh bogian dau o kiginumu 41 munggui ih pinawaliu id Longkod Kopowolihan Dewan Tun Said om piipiro paganakan pinoruput do minundaliu doid lamin tobpinai di lobi oumolig.
“Pinomorisaan nogi nokoilo do kakaal kiharo limo kampung noimangan liud kaamung Kampung Ejok, Gunding, linau, Bobot om Sikul Kabansaan Timbang ih kopoompit do soginumu 83 munggui.
“Gisom baino diti, aiso poh longkod kopowolihan wagu nukaban id bogian diti sumusuut rontob liud di kakaal kiharo id rontob atamangan,” ka dau.
Kawagu dau, piipiro ralan tagayo kaamung Ralan Linau pinoruput do obuli wayaan padsakaian tawagat noopo om Jambatan Gantung Kampung Butong nogi nga noputut sabap nalabpaian waig Bawang Kadamaian.
“Gisom baino diti, koinsanai ralan nalabpaian waig liud pinoruput samakin sumonod om obuli wayaan id ponong kosuabon, poingkuro poh nga momomoguno talun alun pokionuon montok miingat-ingat om sumodia miampai nunu noopo kaantakan au osonong sumusuut rasam ih kikorosian sumapou ontok ponong sosodopon,” ka dau.
Namot dilo, Ponorikohon Komiti Ponorinaan Kaantakan taraat Pogun Sabah Tan Sri Sukarti Wakiman id iso kopoilaan hiti minoboros do nokoburu noh bogian dau o Longkod Panamangan Papanau karaja Kaantakan taraat (PKOB) id watas di pinoboros montok monorina laang ponulungan om kopongomuligan.
Ka dau, koupisan om agensi tumanud Komiti Ponorinaan Kaantakan taraat Watas papanau do pongintongan miampai piulit-ulit suai ko papanau do kapanahakan ponulungan kumaa mogigion di nokoompit miampai kinantakan liud dilo.
“Sakadai diti kaamung noh kopowolihan munggui doid bogian oumolig toiko longkod kopowolihan di nukaban id bogian sompori-pori miagal ih winonsoi id Kota Belud.
“Posorohon tokou nogi o mogigion tuh toririmo tumanud do koingkokoton koyuon tawan di pinalabus do Koupisan Meteorologi Malaysia (Met Malaysia) om manahak do pisokodungan kumaa bogian monguasa nung suhuon montok mundaliu doid bogian oumolig,” ka dau.