Apat ‘suspek’ tinaan pulis
# Minamagahau 7.2 kg syabu kigatang RM500 noribu
KOTA KINABALU: Insan poh kagu pulis nakaanu minanaan piipiro puru ‘sindiket dadah’ ih mogohimu mogowit sumuang 7.2 kilogram dadah kawo syabu kigatang RM500,000 doid pogun diti maya Tutubpoon Kapal Tumulud Sompomoguan Kota Kinabalu (LTAKK) di kosuabon tadau Minggu.
Pesuruhjaya Polis Sabah Datuk Ramli Din minoboros do apat ‘suspek’ kiumur 27 toun gisom 39 toun tinaan di sontimungan puru pulis Koupisan Ponoriukan Jenayah narkotik (JSJN) Longkod Upis Pulis Kontinjen (IPK) Sabah idsuang duo pinonugkuan misusuai idsuang timpu piipiro jam noopo.
“Goduo-duo ‘suspek’ koiso tinaan soira luminabus mantad kapal ih nokorikot mantad Johor id LTAKK id jam 10.15 kosuabon.
“Duo kantung nowit ‘suspek’ nahau pulis om asil pinomorisaan nokoilo do kiharo turu linopotan plastik kisaiz agayo kikotumbayaan do dadah kawo syabu id suang kantung dilo.
“Koinsanai dadah kiwinagat 7.2 kg ih kigatang RM500 noribu id gatang dagang kinoiyonon kalaaps dilo nahau montok laang potilombus,” ka dau id pitimbungakan abar id IPK Sabah koniab.
Nokotindapou nogi ih Kumoduo Pesuruhjaya Polis Sabah Datuk Razarudin Husain om Boyoon JSJN Sabah Superintendan Mohamed Fadzil Rahman.
Minoboros Ramli do sumusuut kinagakaman duo ‘suspek’ koiso bogian dau kalapas dilo minanaan duo kagu ‘suspek’ piipiro jam kalapas dilo id longkod kakadaian.
Asil pinonoriukan nokoilo do kokorui dadah ih nahau maan potikido om gunoon montok dagangon kinoiyonon.
Tumanud dau, kinalantaian kinagakaman ‘sindiket’ dadah timpu diti nopo nga pinamahauan koduo poinggagayo toun diti kalapas kinalantaian koiso ontok 4 Januari kopoompit do 10 paket syabu kigatang RM1 riong id suang pinongolopotan tea.
“Pulis baino diti masaon mogium songulun kagu ‘suspek’ ih pokionuon montok monulung ponoriukan om nointutunan sabaagi Saudi kiumur bindurugan 30-an,” ka dau mikuo minanamba kes soriukon tumanud Seksyen 39B Akta Dadah Koligogon (ADB) 1952 miampai ukuman ‘mandatori’ gisom apatai nung katantu kasalaan.
Namot dilo, noboros di Ramli do tumopot kopio o bogian dau mongipop kaparagatan dadah id pogun diti.
“Laang diti ponokotanda do kinalantayan soira JSJN Sabah nokoporikud do 92 kes pinamahauan idsuang timpu Januari gisom 14 Ogos toun diti piagalon 52 kes noopo idsuang timpu iso’i ontok 2016.
“Nakaanu tokou nogi minamagakom kiginumu 116 tulun montok Seksyen 36B ADB 1952 piagalon 86 noh montok 2016.
“Kinoingkawasan atarang nogi kaanu mongintong kumaa pinanahanan tumanud ADB Laang-Laang Pomunsaan Poimbida (LLPK) maya kopiagalan tolu toun tuminimpuun 2015 bulun noh 22 tulun nokoingkawas kumaa 24 tulun ontok 2016 om idsuang timpu Januari gisom 14 Ogos 2017 nakaanu tokou minanaan kiginumu 52 tulun,” ka dau.
Mokianu nogi isio do pisokodungan mantad tulun ngawi montok poporuput do kaparagatan dadah kumaa bogian pulis montok mongingkudi do kes dadah id Sabah.