Kosonongon mongingia Boros Inggeris mositi kotopong bogian sompomogunan: Mahdzir
NILAI: Muhang o Komontirian Balajaran do mongingia ngawi Boros Inggeris id pointongkop pogun haro ponguasaan boros dilo gisom kosigampot rontob C2 (tosonong kopio) tumanud do Common European Framework of Reference (CEFR).
Montiri dilo Datuk Seri Mahdzir Khalid minoboros do ilo kaanu nogi montok papatantu do ‘standard’ koponudukan om pinsingilaan Boros Inggeris id Malaysia kotopong miampai ‘standard’ sompomogunan.
“Gisom baino diti kiginumu 20,000 toiko 52 paratus mongingia Boros Inggeris id bogian sikul tosuriba om pintangaan nokosigampot noh rontob C1 om C2 tumanud do CEFR.
“Om muhang tokou, kotilombus ELTC papanau do tonggungan diolo montok popoingkawas do rontob ponguasaan om kosonongon mantad kawo ponulisan om miboros do mongingia ngawi Boros Inggeris sabaagi laang montok poposoribau do susumikul di opurokis idsuang boros diti om kaanu monokialit id bogian sompomogunan,” ka dau kumaa do om abaabayan kopongukaban Kolokium Highly Immersive Programme (HIP) hiti, koniab.
Nokotindapou nogi ih Kumoduo Montiri Balajaran II, Datuk Chong Sin Woon; Boyoon Potunud Balajaran, Tan Sri Dr Khair Mohamad om Potunud ELTC, Dr Mohamed Abu Bakar.
Minongomi potilombus, noboros di Mahdzir do pinonimpuunan kampus ELTC diti nogi nga tuni kisusuian montok komontirian soira haro toiso-iso tinan di pinatanggung montok mongigit kararalanon balajaran Boros Inggeris id pogun diti.
“Kinoponuridongan longkod diti nogi ponokotanda do bogian porinta mimang tumopot sabaagi laang montok popoingkawas do kosonongon mongingia ngawi Boros Inggeris id sikul.
Ka dau okon ilo noopo, nga kinopohoroon abaabayan ih kopoompit do koponguasaan Boros Inggeris nogi pinaharo om papanaon id sikul miagal abaabayan (HIP) ‘Dual Language Programme. (DLP).
“Gisom baino diti, kiginumu 5,000 tinan sikul pinapanau do abaabayan HIP om kiginumu 2,000 sikul pinapanau noh abaabayan DLP,” ka dau.
HIP pinaharo montok popogirot do Boros Inggeris miampai papaharo do koyuon om posorili Boros Inggeris id sikul kaanu nogi popointarang do susumikul doid kopomogunaan boros dilo miampai lobi kalaab id sikul.
Kokomoi koyuon liud, noboros di Mahdzir do koponuhuan pongintongan insan-insan id toinsanan Upis Balajaran Watas (PPD) nakalabus noh di Boyoon Potunud Balajaran om linimput kapamanaan liud id bogian pogun ukabon montok tumoguang do nunu noopo kaantakan di lobi koponokialit.
Gisom baino diti pogun ih nokoompit liud nga Sabah, Sarawak om Melaka, tumongob tokou sabap wulan tabantalan kapanau o Poniisan Kopodimpatan Sikul Tosuriba (UPSR). Katapi onu poh nga id bogian PPD nokosodia noh pamalanan diolo sokiro ko antakan toiso-iso di lobi kopotopot... sumodia tokou noopo,” ka dau. -Bernama