SK Pekan Dua minonimpuun mamaramit wulan kinopomorintaan sondiri
LABUAN: Minonimpuun oh susumikul ngawi id SK Pekan Dua hiti minanaandak do wulan kinopomorintaan sondiri 2017 miampai natanud do susumikul ih binuruan do 50 mongingia diolo.
Panaandakan nakapanau id titimungon Gemilang sikul dilo di kawawagu nopo nga nayu do Kalab Rukun Negara nuluwan do ‘Negaraku Sehati Sejiwa’ pinoimagon di Mongingia Tagayo, Awangku Chuchu Pg Mohd Yassin.
“Maya do ababayan miagal diti kaanu tokou popoingkawas kopurimanan karait do rinuludan susuian pogun miampai pininggisaman do buruan om susumangod ngawi minaganu kopomorintaan sondiri,” ka dau.
Pinopobuyu nogi isio kounsikaan kuminaa Kalab Rukun Negara tu nakaanu minomuruan karaja mangayu do ababayan nokomoi.
Agayo kalansanan di Chuchu do kaanu oh ababayan dilo popoimbulai sunduan pisompuruan om piuhupan miampai mongunsikou kinolubukan di minomuruan ngawi.
“Ababayan diti ngawi kapanaak nogi toilaan kumaa susumikul karait do tadau kinopomorintaan sondiri miampai mongunsikou do kinogompoton diri,” ka disio.
Naamot dilo minoboros ih Luguan Kalab Rukun Negara, Nurhayati Ahmad do ababayan dilo nga popoimbulai nogi kabaalan susumikul montok manakadai diolo poingkawas sunduan id doguang tulun ginumuan.
Nokotimpuun oh ababayan dilo di jam 7.00 kosuabon miampai loyou kinopomorintaan sondiri, piboian mamawarana om kinopokilian do bondira id sorili sikul.
Poingampai nogi potindapou ih panakadai ngawi mongingia tagayo miagal di Tg Yasmin Tg Ibrahim, Sabar Dalimin om Rahman Jaafar.