Tanak tondu momuondom kinapatazon tama timpu pomolintaan Jipun
Pomuandaman do timpu pisangadan nokopogovit kaandaman tohunggui kumaa iso tanak tondu sabap tama dosido pinapatai miampai suvai momumuuan kinoizonon ontok May 27, 1945.
Tumanud di Chong Kyu Soo, 77, tama koupusan dosido, Chong Fui Choi, songuhun momumuuan/kategis do Basel Church om nogi songuhun minonimpuun Sikul Takavas Sung Siew doiti.
Id 1938, tama dosido minonimpuun koiso nogi suat abal Sina id Sandakan i kakaal po do baino.
“Ontok toun pisangadan, paganakan dagai poinigizon id Vatu 1.5 id tana apat ikal tinanaman gata. Ontok di Vatu 1.5 nopo nga osodu mantad hongkod kakadazan sabap tuhun nga mintana.
Insan sodop tuhun Jipun nokoikot id daamin om minogovit do tama ku. I no timpu di touvi zou no nokokito disido. Au no ahaid om nokoiho zikoi do pinatai isido miampai27 tuhun suvai om hinobong id kahabangan tagazo.
Kahapas pisangadan, momumuuan kinoizonon minokugad do hobong tagazo di om tina di Kyu Soo om tobpinaai kusai totuo minugad minogintutundo bangkai.Noihaan dioho o tama dosido mantad gaung ginuno disido.
Kyu Soo nopo nga kipuu paganakan tagazo miampai tohu tobpinaai kusai om tuu tondu. Ginompi izioho do tina tavakas Kristian, au izioho sinuu do humodong do tuhun Jipun.
Kyu Soo nokotindapou do Tadau Kasaavan Sandakan 2017 ontok Aug 15 id MemorialPark doiti. Abaabazan di notindapou di Kumoduvo Vozoon Montili Datuk Seri Raymond Tan Shu Kiah id koobian di Vozoon Montili datuk Seri Musa Haji Aman.
Nokotindapou nogi i Komisiono Takavas Australia kumaa Malaysia, Vicki Treadell, ponikoon Kotinanan Kotombuhuzan Sabah Datuk Joniston Bangkuai, polosidin Kounsol Kakadazan Sandakan Datuk Ir.James Wong om puu do Koisaan Veteran ATM Sandakan.
Id pason disido binasa di Raymond, Musa minoboos do susuzan pisangadan piihangan id piahatan Malaysia, Australia om Britan nga iso kapasaavan okon nopo ko kohubukan om kataanan di noduso nga katagakan om kahangadan nogi do puu paganakan.
“Odomon tokou nokotolungku id pisangadan om onu o susuzan popoiho dotokou do onu kinoundasaan dioho id tampat diti om mamanau kapatazon kumaa doid Ranau. Ondomon tokou nogi o tuhun kinoizonon i natagakan niawa do minanankadai do Allied Forces.
“Iti kahansanan ku do kotoonongan i okinaman tokou do baino nga au akasou do pisangadan om pioduan. Ogumu o balajalan tokou mantad susuzan topodi do Malaysia, Australia om Britain nokopiihang poompus timpu pisangadan.
Naamot, Musa minangazou nogi do voou do Kounsol Kakadazan Sandakan, Kotinanan Kotombuhuzan Sabah om puu mangazu montok do kotihombusan do kalaja dioho momohulumat i kusai ngaavi napatai om poposoou do susuzan dioho.