Mongisop gam noduso, iso kagu nosindualan # Kikotumbayaan naratu mantad louting walu id iso linominon id Api-Api Center
KOTA KINABALU: Songulun mongisop gam noduso notilombus id tampat kinantakan om tambalut dau noindamaan nosindualan kalapas naratu mantad tingkat walu id iso linominon Api-Api Center hiti.
Boyoon Pulis Watas Kota Kinabalu Asisten Komisioner M Chandra minoboros do kinantakan id songkonihab id jam 9.50 dongotuong dilo kopoompit do duo kusai kinoiyonon kiumur 15 om 16 toun.
“Kinantakan timpuuni nokoilo do munggui noilaan naratu di mintamong koumoligan ih nokorongou tuni topuod mantad tingkat duo linominon dilo.
“Pinomorisaan potilombus nokoilo do songulun mantad duo kusai id koyuon poinlatan id tingkat duo pinatantu do minidu pogun miampai waya nosindualan id ponong tulu om songulun kagu munggui noindamaan nosindualan.
“Munggui kalapas dilo pinaatod doid Hospital Queen Elizabeth (HQE) montok laang potilombus,” ka dau.
Tumanud dau munggui ih minidu pogun nopo nga tulun kinoiyonon kiumur 15 toun natadon mantad Kampung Penampang Baru, Penampang.
Ka dau, asil pinonoriukan potilombus id tampat kinantakan nokoilo do goduoduo munggui minaganu laang miampai minongisop gam id bogian kawas linominon ih kiharo id tingkat walu linominon pogului kikotumbayan do naratu doid lobi linominon id tingkat duo.
“Nokokito nogi pulis do polositik kiwarna oren kisuang tin gam om polositik opurak kisuang gam om duo solipar kikotumbayaan sanganu munggui id bogian sawat linominon.
“Aiso nunuunu koimaan taraat id kinantakan diti om kes soriukon tumanud Kes Noduso Monigowo (SDR),” ka dau.