10 lamin nokotorimo ponulungan monginsonong tiyonon
SANDAKAN: Kiginumu 10 tinan lamin id Kampung Sim-Sim hiti nokotorimo ponulungan monginsongon id suriba Abaabayan ‘Touch Point’ Lamin Koundangan Pogun (DUN) Tanjung Papat 2017.
Koinsanai boyoon suang lamin ih nokoompit nopo nga mantad bogian mosikin om ih nokorijisto id suriba ekasih.
Boyoon Upisor Eksekutif ESSCOM, Noor Alam Khan A. Wahid Khan minoboros do abaabayan mongumbasi lamin dilo nopo nga id suriba kopongobian Upis Kotundaan Pogun Sabah (SDO) miampai ESSCOM ih ponogi agensi panganjur.
Ka disio projik dilo nopo nga iso mantad projik oupus pogun ih papanaon miampai pogitatabangan kopoompit do mogisusuai agensi.
“ESSCOM ih ponogi agensi ih pinatanggung montok papanau do abaabayan mogitatabang mongumbasi lamin kumaa diolo ih nokosurat id suang e-lasih id Sandakan doulu noh id Kampung Sim-Sim. Nokopomili tokou noh 10 tinan lamin om kosuabon koniab minomonsoi tokou gisom di kaanu momonsoi om alansan kopio karaja ngawi monginsonong kapanau miampai tososonong miampai aiso kakasou doulu noh koyuon tawan.
“Kiginumu RM10,000 pinoobi montok iso lamin montok pongumbasian tokoodo miagal mongumbasi zink toiko taap lamin, tolig naraag noh, sirang om susuai poh. Karaja ngawi mongumbasi tinimpuunan koniab (19 Ogos) om opongo doti idsuang timpu limo tadau.
“Kotoluodan kumaa porinta sabap minonulung rayat di momoguno kopio om alansan tokou do abaabayan irad diti kaanu popotilombus ontok timpu tabantalan,” ka disio id abaabayan pinonimpuunan abaabayan dilo id Tadika Sinar Harapan, Kampung SimSim hiti, koniab.
Namot dilo, songulun mantad nokotorimo sakadai, Mohd Isa, 67, monongkotoluod kumaa bogian porinta om toinsanan agensi nokoompit sabap pinapalantoi do abaabayan monginsonong dilo.
“Yoho sabaagi ponorimo toluod mamagatang kopio minomusorou do abaabayan om alansan kopio tuh ilo kaanu popotilombus sabap otumbayaan oku do kakaal ogumu poh kagu mogigion ih lumansan kopio do ponulungan irad diti,” ka dau.
Nokoiyon isio id lamin dilo miampai sawo om onom tulun tanak dau mantad podi 40 toun nakatalib.