‘Koporintaan BN toririmo moningolig nasib rayat’
SANDAKAN: Opod tinan lamin winonsoi montok rayat id zon kopulauan poinsuang Lamin Koundangan Pogun (DUN) Sekong ponokotanda do otopot kopio kikosianan o koporintaan Barisan Nasional (BN) montok moningolig rayat.
Adun Sekong, Datuk Samsudin Yahya minoboros do koporintaan BN au insan monolikud rayat doulu noh iyolo ih kipandapatan osuriba kaamung noh mogigion id zon kopulauan.
Sakadai dilo, ka disio, okon noopo papagaan do kawagatan diolo nga iso kapadalinan ‘manifestasi’ iso porinta di kitonggungan montok moningolig nasib rayat id pogun diti.
“Toririmo porinta kikosianan toiko kikoinsamadan om maganu kawagatan kotundunan rayat.Mantad dilo, kiguno kopio tumilombus tokou monokodung porinta id suriba kopomuruanan BN om toririmo misompuru om mogisosokodung montok papatantu do pisompuruan om kaandangan di naanu kaanu popotilombus,” ka dau.
Noboros disio ahal dilo kalapas minoi intong karaja ngawi pongumbasian lamin mogigion id Kampung Pulau Shanghai, hiti kopinamot Abaabayan Mongumbasi Lamin miampai Mogitatabang 2017 koniab.
Samsudin ih nogi Boyoon UMNO Bogian Batu Sapi monongkotoluod kopio kumaa Upis Kotundaan Pogun Sabah, sabap ponulungan projik monginsonong montok opod lamin id Pulau Shanghai, Sandakan.
Iti nopo nga kopolombusan Abaabayan Kotundaan montok tujuan moningolig mogigion kampung ih poingiyon id posorili poingompus disan daat id Zon Sekong, Batu Sapi.
Id ahal dilo, pokionuon disio o momuruan mogigion bogian kampung tuh papanau do tonggungan diolo sabaagi ponoko mato om tolingo porinta montok papalantoi do ralan tonudon porinta.
Ka disio, guno momuruan mogigion kiguno kopio montok papatantu rayat id bogian kampung kotorimo kopoilaan tottotopot kokomoi ralan tonudon ngawi om kooturan porinta montok papanau do projik ngawi kotundaan montok kolumaagan songowian.
“Momuruan mogigion mositi mindahu gana montok manahak kopointalangan om kapangaratian kumaa rayat id bogian diolo kokomoi do abaabayan kotundaan om ralan tonudon porinta mooi do karati iyolo do gaab om iman-imanon porinta,” kawagu dau.
Pinatarang di Samsudin do potitikid tulun pokionuon gumaga do kotoonongan di naanu miampai tumilombus manahak kotumbayanan kumaa porinta buruanan do Barisan Nasional (BN) montok mamajamin kopongoputan agenda moningolig rayat.
“Ralan tonudon ngawi porinta ih binuruanan di Luguan Montiri Datuk Seri Najib Tun Razak om Boyoon Montiri Sabah, Datuk Seri Musa Aman okito kopio nokopogowit do mogisusuai kinosimbanan (transformasi) ih kiguno montok koinsanai rayat.
“Mositi do potilombuson tokou o kotoonongan di naanu om nung au tokou kaanu sumuli toluod porinta nga, au minog sumaap toou do porinta,” ka dau.
Samsudin ih nogi Ponorikohon BN batu Sapi mokianu porinta minog manahak ponimbangan montok manahak do lobi ogumu montok abaabayan monginsonong lamin montok Parlimen Batu Sapi doulu noh idsuang DUN Sekong.
“Iti sabap kakaal ogumu mogigion ih poingiyon bogian kepulauan poinsuang DUN dino nokomoi ih kogumuan pakaraja sabaagi monginsada momoguno do pongumbasian lamin sabap lamin niyonon diolo nangaraag noh.
Tumanud dau, baino diti porinta maya ‘Unit Penyelarasan Pelaksanaan’ (ICU) Koupisan Luguan Montiri bulun noh manahak poruntukan atus ribu ringgit kumaa Parlimen Batu Sapi montok mongumbasi 10 tinan lamin nongopili poinsuang DUN dino nokomoi om ilo au kosukup sumusuut kakaal ogumu lamin momoguno do pongumbasian.
Id ningkokoton suai, noboros di Samsudin do baino diti masaon nogi porinta momonsoi duo tinan Masjid sompori-pori id Kampung Pulau Shanghai om Kampung Pulau Tronglit miampai gatang RM500 noribu tiso.
Ka disio, nokosuul nogi do bogian dau do aplikisin montok pamansaian iso sunsuyon mantad Pulau Shanghai pakaayan id Pulau Tronglit kisinodu kiikira 300 meter.
Pinatarang disio do pamansaian sunsuyon dino nokomoi kiguno kopio montok papasanang do susumikul mantad Kampung Pulau Shanghai montok rumikot doid Sikul Kabansaan Pulau Timbang, id Pulau Tronglit, Sandakan.
“Id Batu Sapi, Parlimen Batu Sapi diti doulu noh DUN Sekong diti osorou ku do pongumbasian lamin diti nung 100 unit noopo au koula hinonggo bogian kepulauan di haro kobolingkangan doulu noh id poingompus disan kakadaian ogumu nogi lamin ngawi di mositi umbosian tokou. Om ilo noh alansan kopio oku doid bogian komontirian doulu noh Luguan Montiri kaanu monimbang montok Parlimen Batu Sapi,” kawagu dau.
Nokotindapou nogi ih Kumoduo Porosiden Konsol Kakadaian Sandakan, Haji Hamsan Haji Awang Supain om Ponulung Upisor Monorina ICU Sabah, Suhaili Nip om momuruan Umno Batu Sapi.