WKAN Nabawan noduso id koligaganan talun alun
KENINGAU: Songulun Lansanon Boyoon Mamasok (WKAN) Nabawan noduso soira padsakaian ih pinapanau dau natagakan kapadtamangan om katangkid id KM 48 Ralan Nabawan-Sook ontok sodop Minggu.
Boyoon Pulis Watas Deputi Superintendan Ahmad Jawila minoboros do id kinantakan jam 11.30 dongotuong dilo, munggui ih nointutunan sabaagi Awadot Basi, 44, mantad Kampung Kabangawong Nabawan noduso id tampat kinantakan.
Ka dau, ontok tadau Minggu kiikira jam 11.30 dongotuong, pinoporuput songulun puru pulis trafik Keningau nokotorimo pamalahauan talipaun mantad Balai Polis Sook minoboros do nantakan kinoligaganan id Ralan Nabawan-Sook.
Pinonoriukan id tampat kinantakan nokoilo do kiharo iso padsakaian Perodua Viva ih pinapanau munggui sondiri mantad ponong Nabawan pakaayan id Sook.
“Soira nokorikot id tampat kinantakan, korita ih pinapanau munggui kikotumbayaan do natagakan kapadtamangan om natadon do nakatangkid doid ponong wanan ralan om kalanggar pangantob ralan om nokoturug.
“Munggui nakataam nakalabus om minidu pogun id tampat kinantakan. Tinan munggui nowit doid Lamin Pongusapan Keningau om asil pinomorisaan nokoilo do munggui minidu pogun sabap noindamaan nosindualan id ponong tulu,” ka dau hiti koniab.
Minoboros Ahmad do kinoligaganan au kopoompit do padsakaian suai om ponoriukan potilombuson tumanud Seksyen 41(1) Akta Padsakaian Ralan 1987.